Ish-kapiteni rekordmen i kombëtares sonë kuqezi, Lorik Cana, është një bashkëbisedues i mirë për për mediat franceze, në prag të “El Clasico” së Ligue 1, PSG-Marseill, që do të luhet të dielën, në orën 21:00.
Cana ka luajtur për të dy ekipet dhe ndaj flet hapur. Me interes për lexuesin shqiptar është qasja e tij në raport me të ardhmen e tij në futboll dhe me ngjyrat kuqezi.
Pyetjes se çfarë ka bërë pas pensionimit, mbas “Euro 2016”, Lorik Cana i është përgjigjur:
”Kam krijuar dhe po drejtoj një fondacion me interes publik, Lorik Cana 5, për të promovuar sportin dhe kulturën te fëmijët e disa kopshteve në Tiranë.
Dua t’i ndihmoj ata të rriten duke praktikuar aktivitete sportive, duke u ofruar infrastrukturë. Ky projekt është i rëndësishëm për mua.
Do të prekë, deri në fund të vitit 2019, një mijë të rinj. Futbolli më dha gjithçka. Është detyra ime për ta ndihmuar gjeneratën e re”.
Gazetari francez e pyet ish-kapitenin e Shqipërisë nëse mund ta shohim një ditë në krye të kuqezinjve si trajner. Cana nuk është fort i drejtpërdrejtë, por nuk është në dëshirat e tij ky profesion:
“Shumë njerëz në Shqipëri më lidhin me këtë pozicion, çka më impresionon. Nuk më tërheq më shumë se kaq…Duhet të dëgjoj zemrën time dhe t’u përgjigjem dëshirave të mia. Ne kurrë nuk e parashikojmë dot të ardhmen, por sot për sot synoj një karrierë si drejtues”. 
Në fakt, Loriku e ka pohuar edhe më parë se nuk e sheh veten si trajner, një profesion me shumë stres të përditshëm, por ndoshta si menaxher, drejtor sportiv, por edhe president i ndonjë klubi, që mund ta blejë në të ardhmen.
VAZHDO TË LEXOSH MË TEPËR PËR TEMËN
“Lorik Cana 5”, legjenda kuqezi rrëfen objektivat
“Kombëtarja e futi Shqipërinë në hartën e botës”
“Kam qenë Don Juan, nuk i laj enët”
