Një masë e ashpër, por e detyruar nga institucioni evropian I futbollit në Europë. Asnjë gjyqtar anglez nuk do të gjykojë më asnjë ndeshje të Champions League këtë sezon.
Vendimin e ka marrë UEFA dhe shkak është bërë VAR. Në Angli ende nuk ka nisur të aplikohet sistemi VAR, i cili ka hyrë në fuqi në Champions League nga ky tur.
Sipas UEFA-s, gjyqtarët anglezë nuk kanë përvojë në aplikimin e këtij sistemi dhe, për këtë arsye, nuk do të përzgjidhen në ndeshjet me eliminim direkt, që kanë nisur që prej dy javësh.
Michael Oliver dhe Anthony Taylor, dy gjyqtarët anglezë që kanë gjykuar deri në fazën e grupeve në Champions League, nuk do të përzgjidhen për pjesën e mbetur të këtij turneu.
Sistemi VAR do të nisë të aplikohet në Premier League sezonin tjetër. Zëdhënësi i UEFA-s, për të përditshmen britanike “The Sun” tha: “Për fazën me eliminim të Champions League deri në finale do të përzgjidhen vetëm gjyqtarët që vijnë nga ato shtete që e aplikojnë sistemin VAR”.
Për këtë arsye, në ndeshjet e deritanishme të Champions League janë përzgjedhur më së shumti gjyqtarë nga 6 shtete: Holanda, Spanja, Italia, Gjermania, Turqia dhe Sllovenia.
VAZHDO TË LEXOSH MË TEPËR PËR TEMËN
Champions, UEFA merr vendimin për VAR-in
