Menjëherë pas shkarkimit të Christian Panuccit nga Kombëtarja shqiptare, në drejtim të trajnerit u përfolën shumë oferta, thuajse të gjitha në Serie B në Itali.
Përpos shumë klubeve, në mes ka hyrë edhe Salernitana, që pronar ka presidentin e Lazios, Claudio Lotito.
Drejtori sportiv i Lazios, Igli Tare, mund t’i ofrojë postin e trajnerit të Salernitanas ish-trajnerit të ekipit të Shqipërisë, Christian Panucci.
Tare po mendon për zëvendësuesin e teknikut Angelo Gregucci dhe ish-trajneri i Shqipërisë mund të jetë një kandidat potencial.
Shqiptari e njeh mjaft mirë karakterin e Panuccit, pavarësisht se një lëvizje e tillë nuk do t’u pëlqejë shumë tifozëve lacialë duke qenë se Panucci ka luajtur një jetë me Romën. Megjithatë, Tare do të ndihmonte edhe FSHF-në.
Marrëveshja mes Panuccit dhe Salernitanës do t’i kursente milionat institucionit më të lartë të futbollit në vendin tone, që vazhdon dhe paguan italianin, pavarësisht se nuk drejton më kombëtaren tonë.
