Bashkimi Evropian ka thënë se po përgatit një raund të ri të sanksioneve kundër forcave të sigurisë të Venezuelës të përfshira në shkeljet e pretenduara të të drejtave të njeriut.
Federica Mogherini, shefja e politikës së jashtme të bllokut, tha në një deklaratë të martën se vdekja e kapitenit të marinës Rafael Acosta, ndërsa ishte në paraburgim për pjesëmarrje të dyshuar në një komplot grusht shteti, ishte një “shembull” i situatës së përkeqësuar në Venezuelë.
“BE është e gatshme të fillojë punën për zbatimin e masave të synuara për ata pjesëtarë të forcave të sigurisë të përfshira në tortura dhe shkelje të tjera serioze të të drejtave të njeriut”, tha Mogherini në një deklaratë të martën.
Mogherini paralajmëroi gjithashtu se nëse nuk arrihen “rezultate konkrete” në bisedimet aktuale midis opozitës dhe qeverisë për të zgjidhur krizën politike, BE do të jetë gati të shtojë masat e saj.
Anëtarët e qeverisë së presidentit të Venezuelës, Nicolas Maduro dhe përfaqësuesit e opozitës po mbajnë bisedime në Barbados.
Ministri i jashtëm i Venezuelës tha se qeveria “hodhi poshtë” deklaratën e Mogherini, duke shtuar se ajo duhet të qëndrojë larg negociatave të vazhdueshme.
“Federica Mogherini edhe njëherë duke u ndërhyrë në punët tona të brendshme”, shkroi Jorge Arreaza në Twitter.
Carlos Pina, një analist venezuelian, tha se BE po merrte një rol udhëheqës në përpjekjet e bashkësisë ndërkombëtare për të zgjidhur krizën. “BE është duke e pozicionuar veten si një aktor me ndikim dhe vendimtar,” i tha ai Al Jazeera nga kryeqyteti i Venezuelës, Caracas.
Në deklaratën e saj, Mogherini gjithashtu ripohoi nevojën për një zgjidhje “urgjente” politike.
Venezuela ka qenë në një recesion të thellë për pesë vjet. Mungesa e ushqimit dhe ilaçeve është e shpeshtë, dhe rreth një e katërta e popullsisë prej 30 milionë banorëve të Venezuelës kërkon ndihmë, sipas Kombeve të Bashkuara.
VAZHDO TË LEXOSH MË TEPËR PËR TEMËN
“Zien” Venezuela/ Pse u shkëputën lidhjet me SHBA-në?
4 milion njerëz janë larguar nga Venezuela
E vetmja alternativë e mbetur për Venezuelën është pritja…
