Informatori, ankesa e të cilit ka çuar në nisjen e procedurave për shkarkimin e presidentit amerikan, Donald Trump, është oficer i CIA-s, raportojnë mediat amerikane.
Zyrtari dikur ka punuar në Shtëpinë e Bardhë, shkruajnë New York Times, Washington Post dhe Reuters.
Informatori ka thënë se zyrtarë të Shtëpisë së Bardhë kanë bërë përpjekje “t’i fshehin” të gjitha detajet e një bisede telefonike midis Trumpit dhe presidentit të Ukrainës.
Në telefonatën e 25 korrikut, Trump thuhet se i ka bërë presion homologut ukrainas, Volodymyr Zelensky, për të hetuar rivalin e tij kryesor nga Partia Demokratike, Joe Biden.
Demokratët thonë se Trump ka kërkuar ndihmë nga jashtë për të njollosur Bidenin, i cili shihet si kandidat i mundshëm për zgjedhjet presidenciale të vitit 2020.
Trump, e ka cilësuar procesin si “mashtrim” dhe “gjueti shtrigash”.
Më shumë detaje për informatorin nuk dihen. Një avokat i tij ka paralajmëruar se përpjekja për ta identifikuar atë mund ta dëmtojë.
Ankesa e informatorit e akuzon Trumpin për “shfytëzimin e pushtetit për të kërkuar ndërhyrje nga një vend i huaj në zgjedhjet e 2020-ës në SHBA”.
Dokumenti i deklasifikuar e karakterizon sjelljen e presidentit si një “problem serioz ose flagrant” dhe si “abuzim ose shkelje të ligjit”.
Shkelja e pretenduar ka të bëjë me kërkesën e Trumpit që homologu i tij të hetojë akuzat e pabazuara kundër Bidenit.
Informatori ka thënë në ankesë se ka mësuar nga disa burime se zyrtarë të lartë të Shtëpisë së Bardhë kanë ndërhyrë për t’i “mbyllur” të gjitha regjistrimet e thirrjes, veçanërisht një transkriptim zyrtar fjalë për fjalë.
VAZHDO TË LEXOSH MË TEPËR PËR TEMËN
Tani edhe amerikanët në ‘moçalin’ ukrainas…
Në skandalin SHBA-Ukrainë, Rusia është fituese
