Nën dyshimet se ka pasur dijeni për vrasjen e Santjago Malkos dhe ka penguar zbardhjen e së vërtetës, Policia e Tiranës arrestoi dje shtetasin Blendi Teta.
Ky i fundit është shoqëruar në orët e para të mëngjesit të djeshëm në Polici dhe më pas i është komunikuar arrestimi.
Burime thanë se i riu është kapur nga kamerat e sigurisë në vendin e ngjarjes, megjithëse vetë i dyshuari ka thënë se nuk ka asnjë lidhje me krimin.
Santjago Malko ishte një ish-polic i larguar rreth 3 vite më parë nga uniformat blu, në momentin që ndodhi vrasja po udhëtonte me makinën e tij “BMW”, kur i ka prerë rrugën një furgon i bardhë.
Dyshimet e para të hetuesve janë se 2 persona hapën zjarr ndaj tij, duke bërë që Malko të humbë drejtimin e makinës dhe të dalë nga rruga vetëm 500 metra më tutje.
Për më shumë se dy javë, Polica ende nuk ka identifikuar asnjë autor për vrasjen e Malkos.
Prokuroria e Tiranës është duke hetuar në disa drejtime për të zbardhur vrasjen e 26- vjeçarit, i cili rezulton i përfshirë me komponentë të botës së krimit. Rreth tri vite më parë, Malko ka qenë i përfshirë në një sherr që ka ndodhur në një pikë bastesh, sherr i cili është kaluar në sitë nga Prokuroria. Ndërkohë, pas përfundimit të këqyrjes së pamjeve filmike, kanë ardhur edhe arrestimet e para.
VAZHDO TË LEXOSH MË TEPËR PËR TEMËN
U ekzekutua mbrëmë/ Del fotoja, ja kush është Santiago Malko
