Pas shumë statistikash në fundvit, nuk mund të mungonte edhe sportisti më i pasur i dekadës së fundit. Floyd Mayweather konfirmohet si sportisti më i pasur.
Është revista prestigjioze amerikane “Forbes” që bën të ditur këtë, teksa publikoi listën e sportistëve që kanë siguruar më shumë të ardhura nga 2010 dhe deri tani.
Boksieri amerikan që ka derdhur në llogaritë e tij bankare plot 915 milionë dollarë. Pas Mayweather, për pasuritë e tyre renditen 2 yjet e futbollit botëror: Cristiano Ronaldo dhe Lionel Messi.
Ronaldo është i dyti me 800 milionë dollarë, me portugezin që më shumë fiton jashtë fushe se sa brenda saj, falë kontratave me Nike e rrjetet sociale, duke qenë se është sportisti me më shumë ndjekës në Instagram dhe Facebook.
Ndërsa argjentinasi në këtë dekadë ka mundur të fitojë 750 milionë dollarë. Ndryshe nga Ronaldo, Messi përfiton më shumë nga paraqitjet e tij në fushën e lojës, duke qenë se askush nuk paguhet më shumë se ai nga klubi ku aktivizohet.
Klasifikimi i Forbes vijon me yllin e Los Angeles Lakers në NBA, LeBron James, me 680 milionë dollarë të fituara në 10 vitet e fundit. Edhe James më shumë fiton nga kontratat me kompanitë e veshjeve sportive sesa nga paga.
Pas tij qëndron një tjetër legjendë e sportit botëror, Roger Federer, që ka lënë pas golfistët Tiger Woods dhe Phil Mickleson. Klasifikimin e 10 sportistëve më të pasur të dekadës së fundit e plotëson 6 herë kampioni i botës në Formula 1, Lewis Hamilton, me 400 milionë dollarë.
Vlen të theksohet se Serena Williams është e vetmja sportiste femër që përfshihet mes 40 sportistëve që kanë fituar më shumë në këtë dekadë me 215 milionë dollarë të fituara.
VAZHDO TË LEXOSH MË TEPËR PËR TEMËN
10 momentet e dekadës në Premier League
Yjet e futbollit që u tërhoqën në vitin 2019
