Pep Guardiola mund të jetë trajneri i ri i Juventusit sezonin e ardhshëm. Lajmin e ka konfirmuar e përditshmja britanike “Daily Mail”, që shprehet se trajneri spanjoll mund të zërë vendin e Maurizio Sarri në stolin e bardhezinjve.
Sarri nuk po bind në stolin e Juventusit dhe situata kohët e fundit nuk është shumë pozitive te kampionët e Italisë. E njëjta situatë edhe te Manchester City, që po luan dobët këtë sezon në Premier League dhe trajneri Guardiola është vënë shpesh në shënjestër.
Sarri ka ende shanse të shpëtojë vendin e tij, duke fituar një trofe të madh, si kampionatin apo Champions League. Gjithsesi, Guardiola mbetet “ëndrra në sirtar” e bardhezinjve, që e kanë kërkuar trajnerin spanjoll edhe një vit më parë kur iku Allegri.
Guardiola aktualisht paguhet 15 milionë stërlina në sezon te City, çka mbetet ngërçi më i madh për Juventusin. Trajneri spanjoll ka thënë se do të respektojë kontratën me “citizens”, por nëse situata nuk ndryshon në kampionat ai mund të largohet drejt Serisë A.