Thomas Strakosha sapo ka festuar 25-vjetorin e tij, por mund të mburret që tani se ka një vend të veçantë në historinë e klubit të Lazios. Portieri shqiptar mban një rekord, të cilin mund ta përmirësojë në vijim. Gardiani i Kombëtares shqiptare në muajin janar hyri në renditjen e 10 gardianëve me më shumë ndeshje me fanellën e Lazios.
Shifra arriti në 154 ndeshje me fanellën bardhekaltër, duke e bërë atë portierin e 10-të me më shumë sfida të luajtura në historinë e klubit. Arritja bëhet edhe më prestigjioze nga fakti se asnjë portier jo italian nuk ka bërë më mirë se ai, pasi ata 9 që kanë luajtur më shumë janë të gjithë vendas.
Kjo është meritë e një vazhdimësie të jashtëzakonshme të gardianit shqiptar, i cili në tre kampionatet e fundit në 102 ndeshje ka munguar në fushë vetëm në 3 sfida. Në total ai regjistron 120 ndeshje në Serie A, 14 në Kupën e Italisë, 2 në Superkupë dhe 18 në Europë.
Shifra mbresëlënëse për portierin shqiptar që u bë titullar për shkak të dëmtimit të Marchetti-t 3 vjet më parë dhe tani është pjesë e ekipit që ka mbrojtjen më të mirë këtë sezon në Serinë A.
Nëse kampionati vazhdon, për Strakoshën do të jetë mundësia të kapërcejë edhe vendin e 9 të Gradellas, vendin e 8 të Blason dhe të arrijë legjendarin Sentimenti. Strakosha pret fundin e karantinës për të hedhur firmën në rinovimin e kontratës me klubin që nuk dëshiron ta lërë t’i ikë nga dora portierin shqiptar.