Ekipi i LASK, që kryesonte Bundesligën austriake, ka humbur vendin e parë pasi iu zbritën 6 pikë në renditje. Komiteti ekzekutiv i Federatës austriake i hoqi këto pikë dhe vuri gjobën prej 75 mijë euro për shkeljen e protokollit të sigurisë për të shmangur infektimin nga koronavirus.
LASK kishte shkelur rregullat e sigurisë në disa seanca stërvitore, duke mos zbatuar protokollin për stërvitje individuale në fillim e pastaj në grupe të vogla. Kjo skuadër është stërvitur në grupe të mëdha, madje klubet e tjera të Bundesligës austriake e kanë denoncuar këtë ekip edhe për zhvillimin e ndeshjeve testuese brenda grupit.
Një goditje shumë e rëndë për këtë ekip. LASK është rivali i Manchester United në Europa League dhe ndeshja pritet të luhet në javën e parë të gushtit. Klubi i LASK ka deklaruar se do të apelojë vendimin dhe nëse është e nevojshme, do ta çojë çështjen edhe më CAS.
Kampionati në Austri rinis më 2 qershor, teksa mbeten edhe 10 javë deri në fund. Me këtë sanksion, LASK barazohet me pikë me Salzburg, nga 48 secili, por ky i fundit ka golaverazhin më të mirë dhe merr kreun. LASK ka fituar vetëm një herë kampionatin austriak dhe shpreson ta fitojë për herë të dytë.