Do të ketë edhe pak “Shqipëri” sonte në ndeshjen Juventus-Milan, e vlefshme për gjysmëfinalen e kthimit të Kupës së Italisë, që përkon edhe rikthimin e futbollit italian pas 3 muajsh. Xhakomo Vrioni do të jetë mbrëmjen e sotme për herë të parë i grumbulluar me ekipin e parë të Juventusit.
Sulmuesi i talentuar shqiptar, i cili është pjesë e të rinjve bardhezi, prej disa ditësh është stërvitur me yjet e drejtuar nga Maurizio Sarri dhe mesa duket ia ka mbushur mendjen trajnerit të “Zonjës së Vjetër”, për ta grumbulluar në gjysmëfinalen e Kupës së Italisë ndaj Milanit.
Një ëndërr e bërë realitet për Vrionin për të cilin pritshmëritë janë të mëdha, ndërsa fati mund të rezervojë mbrëmjen e sotme edhe një debutim për sulmuesin. Kështu, pas Manajt te Barcelona dhe Brojës te Chelsea, Shqipëria ka edhe një tjetër futbollist në një nga klubet më të rëndësishme europiane.