Tabloja më e madhe në botë, e konfirmuar si një nga rekordet botërore “Guinnes” dhe titulluar “The Journey of Humanity”, u shit në vlerën prej 62 milionë dollarësh, duke e radhitur kështu, në mesin e veprave më të shtrenjta artistike që janë shitur ndonjëherë në ankand.
Vepra e artit e punuar në kanavacë nga britaniku Sacha Jafri është 1595.76 metra katrorë dhe u shit në Dubai.
“The Journey of Humanity” është e ndarë në 70 korniza, që u blenë nga Andre Abdoune, një shtetas francez me banim në Dubai.
Sipërmarrësi i bleu të 70 segmentet, – kanë deklaruar organizatorët. Shuma ishte sa dyfishi i asaj të synuar dhe të gjitha paratë shkuan për bamirësi, në ndihmë të fëmijëve në nevojë.
“Unë vij nga një familje e varfër dhe e di se si është që të mos kesh asgjë për të ngrënë, por të paktën kisha dashurinë e prindërve të mi, shkollimin dhe mbështetjen”, – tha Abdoune, i cili drejton një biznes kripto-valutash.
“Piktura ishte shumë e fuqishme kur e pashë dhe për mua, do të kishte qenë një gabim të ndaja copëza” – tha ai.
Ndërkohë, artisti bashkohor Sacha Jafri, shpreson që puna e tij të nxisjë një lëvizje humanitare, pasi në pikturë u përfshinë edhe punime nga fëmijët në 140 vende të botës.