IOC (Komiteti Olimpik Ndërkombëtar) u vendos ultimatum disa shteteve në lidhje me pranimin e sportistëve, teksa ka paralajmëruar edhe Serbinë që do ta përjashtojë nga organizimi i ngjarjeve të mëdha sportive nëse nuk e lejon pjesëmarrjen e garuesve nga Kosova.
Konkretisht, IOC kritikon ashpër sjelljen e Serbisë dhe Malajzisë, vende të cilat po refuzojnë t’i lejojnë sportistët nga vende të caktuara për të marrë pjesë në garat që i organizojnë ato.
IOC u ka dërguar letra të dyja Komiteteve Olimpike të këtyre vendeve duke ua bërë me dije paralajmërimin nëse vazhdojnë me politika të njëjta. Qeveria serbe ndaloi Kosovën të marrë pjesë në Kampionatin Botëror të Boksit, i cili u mbajt disa javë më parë.
Me këtë rast, Komiteti Olimpik Ndërkombëtar ka kërkuar që të gjithë sportistët të konsiderohen të barabartë dhe të respektohen njëjtë. Në letër shkruhet gjithashtu se IOC do të jetë mjaft vigjilent para se t’ua japë organizimin e ngjarjeve sportive shteteve të caktuara.
