Dy skuadra angleze kanë bërë mirë në ndeshjet e para cerekfinale të Champions League, duke hedhur një hap drejt gjysmëfinaleve. Manchester City fitoi 1-0 në shtëpi me Atletico Madrid, ndërsa Liverpool mposhti 3-1 Benfikën në transfertë.
City dominoi ndaj madrilenëve në të dyja pjesët dhe rezultati duhet të ishte më i thellë. Pas një mori rastesh në të parën, goli do të vinte në të dytën, me Kevin de Bryune në minutën e 70-të, pas pasimit të Foden.
Një rezultat i mirë për të besuarit e Guardiola-s, por që gjithsesi, ende nuk është thënë fjala e fundit, pasi Atletico Madrid mund të përmbysë në kthim. Edhe sonte pati 2 kundërsulme vrastare, që nëse do të kishte shënuar, do të ishte histori tjetër.
Ndërsa Liverpool pa frikë mund ta quajmë gjysmëfinalist. Të Kuqtë shënuan 2 gola në pjesën e parë me Konate në 17’ dhe Mane në 34’. Vendasit patën dy raste të mira për të ngushtuar në 45 minutat e para, por edhe Salah mund të kishte shënuar të tretin.
Në pjesën e dytë, Benfika ngushton në 1-2 në minutën e 49-të me Nunez dhe luftoi për të paktën një barazim. Por në 87’ Diaz vrau shpresat e vendasve me golin e tretë. Pas një jave luhen ndeshjet e kthimit.
