Presidenti francez Emmanuel Macron, u kërkoi prindërve sot që t’i mbajnë fëmijët adoleshentë në shtëpi, ndërsa propozoi kufizime në media sociale për t’iu dhënë fund trazirave që u përhapën në të gjithë Francën, pas vrasjes fatale nga policia të një 17-vjeçari.
Protestat kanë rezultuar deri më tani me arrestimin e rreth 900 personave. Pas një takimi të dytë në këto kohë trazirash me ministra të lartë, Macron pohoi se platformat e mediave sociale si Snapchat dhe TikTok luajtën një “rol të konsiderueshëm” në nxitjen e akteve të dhunës gjatë protestave këtë javë.
Ai tha se qeveria e tij do të punojë me kompanitë e teknologjisë për të vendosur procedura për “heqjen e përmbajtjes më të ndjeshme”, por nuk specifikoi përmbajtjen, duke theksuar se pret një “frymë përgjegjësie nga këto platforma”.
“Autoritetet franceze planifikojnë gjithashtu të kërkojnë, kur është “e dobishme”, identitetet e atyre që përdorin këto rrjete sociale për të nxitur trazira ose për të përkeqësuar dhunën”, u shpreh presidenti francez.
Macron tha se një e treta e individëve të arrestuar mbrëmjen e djeshme ishin të rinj dhe se sipas tij “është përgjegjësi e prindërve” që t’i mbajnë fëmijët e tyre në shtëpi.
Protestuesit ngritën barrikada, ndezën zjarre dhe qëlluan me fishekzjarrë ndaj policisë, e cila u përgjigj me gaz lotsjellës, topa uji dhe granata trullosëse. Gjatë këtyre protestave rreth 200 njerëz mbetën të plagosur. 40.000 oficerë janë angazhuar për të rivendosur rendin dhe sigurinë në vend.
VAZHDO TË LEXOSH MË TEPËR PËR TEMËN
“Flet për pensionet dhe mban orë 80 mijë euro”
“Harrojeni bashkimin, tani zgjedhjet sjellin hakmarrje”
