Nga e mërkura, përdoruesit në mbarë botën do të kenë mundësi të përdorin modelin më të ri të Inteligjencës Artificiale nga Google, “Gemini”, dhe i cili do të integrohet në “Bard” sikurse edhe në smartfonët më të rinj Pixel 8 Pro.
Duke nënvizuar “performancën më të avancuar të ‘Gemini’-t nëpër shumë pika kryesore krahasimi”, CEO i Google, Sundar Pichai tha se “Gemini 1.0” është optimizuar për madhësi të ndryshme: Ultra, Pro dhe Nano.
“Këto janë modelet e para të epokës ‘Gemini’ dhe realizimi i parë i vizionit që patëm kur formuam ‘Google DeepMind’ në fillim të këtij viti. Kjo epokë e re e modeleve përfaqëson një nga përpjekjet më të mëdha shkencore dhe inxhinierike që kemi ndërmarrë si kompani”, tha Pichai në shënimin e tij, raporton Klankosova.tv.
“Gemini” u krijua për të qenë multimodal dhe për këtë arsye mund të “përgjithësojë dhe kuptojë pa probleme, të veprojë dhe të kombinojë lloje të ndryshme informacioni duke përfshirë tekstin, kodin, audion, imazhin dhe videon”.
Në një nga demonstrimet, “Google” tregoi se si “Gemini” mund të shohë si syri i njeriut, të kuptojë dhe vlerësojë në kohë reale dhe të sugjerojë rrugën e ardhshme të veprimit.
Përderisa “Gemini Ultra” do të jetë modeli më i madh dhe më i aftë për detyra shumë komplekse, “Gemini Pro” do të jetë më i miri në shkallëzimin e një game të gjerë detyrash dhe “Gemini Nano” do të menaxhojë detyrat në pajisje.
Nga sot, “Gemini Nano” do të jetë i disponueshëm në “Pixel 8 Pro”, duke fuqizuar veçori të reja si “Përmbledhjet” në aplikacionin “Recorder” dhe “Smart Reply” përmes “Gboard”, duke filluar me “WhatsApp”. “Gemini” do të shpërndahet në më shumë produkte dhe shërbime të “Google” si “Search”, “Ads”, “Chrome” dhe “Duet AI”.
Një njoftim tha se “Google” tashmë po fillon të eksperimentojë me “Gemini” në “Search”, “ku po e bën më të shpejtë Përvojën Gjeneruese të Kërkimit (SGE) për përdoruesit, me një reduktim prej 40 për qind të vonesës në anglisht në ShBA, së bashku me përmirësimet në cilësi”.
Nga 13 dhjetori, zhvilluesit dhe klientët e ndërmarrjeve do të jenë në gjendje të qasen në “Gemini Pro” përmes “Gemini API” në “Google AI Studio” ose “Google Cloud Vertex AI”.
Ndërkohë, “Bard” do të marrë një “version të akorduar në mënyrë specifike të ‘Gemini Pro’ në anglisht për arsyetim, planifikim, kuptim dhe më shumë” nga sot. Në fillim të vitit të ardhshëm, “Google” do të prezantojë “Bard Advanced”, i cili u jep përdoruesve qasjen e parë në modelet dhe aftësitë më të avancuara – duke filluar me “Gemini Ultra”.
“Google” pretendon se performanca e “Gemini Ultra” “tejkalon rezultatet aktuale më të avancuara në 30 nga 32 standardet akademike të përdorura gjerësisht” të përdorura në kërkimin dhe zhvillimin e modeleve të mëdha gjuhësore (LLM).
Me një rezultat prej 90,0%, “Gemini Ultra” është modeli i parë që tejkalon ekspertët njerëzorë në kuptimin masiv të gjuhës me shumë detyra (MMLU), i cili përdor një kombinim të 57 lëndëve si matematika, fizika, historia, ligji, mjekësia dhe etika për testimin e të dyja – njohurive botërore dhe aftësive për zgjidhjen e problemeve.
Plus, pretendoi kompania, “Gemini” mund të “kuptojë, shpjegojë dhe gjenerojë kode me cilësi të lartë në gjuhët më të njohura të programimit në botë, si Python, Java, C++ dhe Go”.
VAZHDO TË LEXOSH MË TEPËR PËR TEMËN
10 punët që mund të zhduken nga inteligjenca artificiale
“Inteligjenca artificiale do të përdoret për të vrarë njerëz në të ardhmen…”
