Gerald Knaus nga Iniciativa Europiane për Stabilitet, ka reguar pasi Lista Serbe doli kundër votimit të 21 prillit për largimin e kryetarëve shqiptarë nga udhëheqja e katër komunave në veri të Kosovës.
Në një reagim në “X”, Knaus thotë se kriza në Kosovë që e nxiti dhunën në veri “do të vazhdojë”, se kjo “nuk mund ta befasojë askënd” dhe se nëse Gjermania, Franca, BE-ja nuk zgjohen, do të ketë luftëra të reja.
Ai shkroi më tej se strategjia aktuale e BE-së dhe SHBA-së për dialogun Kosovë-Serbi, ka dështuar.
“Strategjia aktuale e dialogut të BE-së për Serbinë-Kosovën ka dështuar. Beogradi që në fillim ka hedhur poshtë hapur çdo strategji njohjeje ‘de facto’. Beogradi e përsëriti këtë, përsëri dhe përsëri: nuk ka marrëveshje. Nuk ka pasur kurrë. Strategjia e BE-së (dhe e SHBA-së) bazohet në analizën e gabuar: që procesi aktual i anëtarësimit në BE i jep BE-së ndikim në Serbi”, shkroi Knaus.
Ndër të tjera, ai theksoi se rënia e besueshmërisë nga BE lidhur me politikat e ndërmarra në rajon, e bën këtë një moment të rrezikshëm në Ballkan që nga viti 2001.
“Një arsye e dukshme për kolapsin e masave të BE-së është rënia e çdo politike të besueshme të pranimit në BE për këdo në rajon. E gjithë kjo bën që ky të jetë momenti më i rrezikshëm në Ballkan që nga viti 2001”, shkruan Knaus.
Ai thotë se “shumë në të gjithë BE-në ende nuk e shohin ose pretendojnë se nuk e shohin këtë”, duke shtuar se kjo nuk zgjidhet me “Planin e rritjes”.
“Në vend të kësaj, lojtarët kryesorë në rajon presin dhunë të re dhe përgatiten për të. Nëse Gjermania, Franca, BE-ja nuk zgjohen, do të ketë luftëra të reja. Dhe një dështim vërtet katastrofik të BE-së”, shkroi Knaus.
VAZHDO TË LEXOSH MË TEPËR PËR TEMËN
“Të lirohen urgjentisht policët e rrëmbyer nga Serbia”
“S’mund të mbahen zgjedhje pa u shtensionuar situata”
“Kurti dhe Vuçiç sí japin as dorën njëri-tjetrit”
