Gjatë vizitës në Shkup, Papa Françesku do të drejtojë një meshë në përkujtim të Nënë Terezës, humanistes së njohur botërore dhe fitueses së çmimit “Nobel”, lindur në Shkup.
“Jam shumë i gëzuar që jam ne vendin e shenjtores Nënë Tereza dhe mund të bëj një lutje në kishën ku ajo është pagëzuar, në kishën “Zemra e Shenjtë e Jezusit”, – ka theksuar kreu i kishës romake-katolike, Papa Françesku.
“Për mua, do të jetë nder i madh që, për disa orë do të mund të lutem në Shtëpinë Përkujtimore dedikuar asaj, e cila, është ndërtuar në vendin ku më parë ishte Katedralja katolike”, – u shpreh Papa Françesku.
“Vizitën time ia kushtoj një shenjtoreje të madhe, një bije të vendit tuaj, Nënë Terezës, e lindur dhe e rritur në Shkup, e cila me ndihmën e Zotit, u bë misionare e guximshme e Krishtit në botë, duke u dhënë shpresë dhe dinjitetin të varfërve”, – ka theksuar, Papa.
Gjatë qëndrimit në Shkup, Ati i Shenjtë do të pranojë edhe një dhuratë nga Kosova, shtatoren e Nënë Terezës, të punuar nga familja e Isë H.Buzukut, nga Tygjevci i Kamenicës, sipas njoftimit të ambasadorit të Kosovës në Shkup, Gjergj Dedaj.
Anjezë Gonxhe Bojaxhiu e njohur si “Nënë Tereza”, lindi në Shkup, më 26 gusht të vitit 1910 dhe vdiq më 5 shtator 1997, në Kalkuta, (Indi). Nënë Tereza ishte humaniste e njohur shqiptare, fituese e çmimit “Nobel për Paqen”, ndërsa më 19 tetor të vitit 2003 u shpall e bekuar nga Vatikani.
Nënë Tereza u bë një nga urat ndërlidhëse të njohjes së shqiptarëve në botë. Ish-presidenti Clinton është shprehur në qershor 2002: “Nënë Tereza, ishte e para Ajo, që më bëri ta dua kombin shqiptar. Tani ndihem shumë krenar që plotësova një detyrë morale ndaj saj dhe ndaj vlerave të lirisë”.
Para vizitës në Maqedoninë e Veriut, Papa Françesku ka qëndruar në Bullgari, mes të tjerash me qëllim përmirësimin e marrëdhënieve me Kishën Ortodokse, si pjesë e planeve të Vatikanit për të arritur një bashkim të mundshëm midis degëve të krishtërimit, nga Lindja dhe Perëndimi, që u ndanë në vitin 1054.
VAZHDO TË LEXOSH MË TEPËR PËR TEMËN
“E pazëvendësueshme nëse je ndryshe”
Nënë Tereza, shqiptarja që mrekulloi botën!
