U prezantua në kinema, premiera e filmit “Inane”, me regji nga Besnik Bisha. Me ngjarjet në Shqipërinë e viteve ’70-të, filmi sjell një histori dashurie krejt të pazakontë.
Filmi më i ri i regjisorit Bisha, bazohet në romanin “Verë pa kthim” të autorit Besnik Mustafaraj. “E pamend” aq sa edhe “Zoti mund të çuditet”! – kështu vjen subjekti i ekranizuar i historisë së e rrallë të dashurisë, në filmin “Inane”.
Filmi bazohet mbi një histori dashurie, një shpirt të tronditur nga dashuria. Sana (Anila Bisha, Rea Bisha) që jetën e saj e lidh me një premtim të kahershëm. Regjisori Bisha, e sjell në një ëndërr premtimin e dy të rinjve, një ëndërr që zgjat vetëm shtatë ditë. Janë shtatë ditë, që rikthejnë protagonistët Anila Bisha dhe Neritan Liçaj (Gori në film) 30 vite pas, në kohën e dashurisë së tyre të papërmbushur. Artistët kanë rrëfyer punën, për realizimin e filmit.
“Filmi është një ëndërr, një pritje e gjatë e protagonistes, e cila mendon se një ditë, Gori do të vijë dhe kur të kthehet, gjithçka do të rinisë atje ku ishte lënë. Ne, në fakt, në film e quajmë si një veprim të drejtë, por në një kohë që mosha ecën edhe gruaja humbet orën biologjike. Mendoj se njeriu ka moshë edhe ka orë biologjike. Ndjenja e mëmësisë bën të vetën. Prandaj, kjo pritje është e pamend. Çdo pritje ka një kufi, që nuk duhet që t’i kalojë përmasat njerëzore”, – ka thënë, Besnik Bisha.
Edhe për aktoren Anila Bisha, e cila në këtë film është protagonist, ky personazh është shumë kompleks për peshën emocionale që nbart. Megjithatë, ajo mendon se çdo grua duhet të jetojë, jetën se është e bukur, duke mos iu nënshtruar as për shkak të rrethanave.
“Veprimi i Sanës është që ajo u mbyll brenda guaskës së saj edhe iu nënshtrua fatit, por jeta është e bukur edhe duhet jetuar”, – shprehet protagonistja, Anila Bisha.
“E njoh Besnik Bishën, që nga filmi i tij i parë, deri tek ky i fundit. Më pëlqen, se ai ka guximin të ndryshojë dhe kjo, shihet në të gjithë filmat që ka realizuar. “Inane” është një nga filmat më të mirë që ka bërë deri tani”, – ka thënë për mediet, kineasti Kristaq Dhamo.
Regjisori Bisha, në këtë film të mbështetur nga Qendra Kombëtare e Kinematografisë, sjell në bardhezi kinemanë e viteve ’70, me ngjarjet të jetuara në të njëjtën periudhë. Xhirimet janë realizuar në Shqipëri (Korçë, Durrës, Tiranë). Ndërsa, filmin, mund ta ndiqni në kinema.
VAZHDO TË LEXOSH MË TEPËR PËR TEMËN
‘Streha mes reve’, një film që kalon kufijtë
‘Derisa të besosh te vetja, nuk ke për të pasur një jetë’
‘’Delegacioni’’, filmi që nis rrugëtimin ndërkombëtar
