Pas ndryshimeve të bëra në sheshin e Shkupit “Maqedonia”, janë mbuluar gjurmët e shtëpisë së Nënë Terezës, ndërsa me parkun e vendosur para pllakës përkujtimore, praktikisht është mbyllur rruga që të vendosen lule edhe te pllaka, Instituti i Trashëgimisë Shpirtërore e Kulturore të Shqiptarëve, përkatësisht Departamenti për Mbrojtjen e Trashëgimisë së Gonxhe Bojaxhiut – Nënë Terezës, shpreh indinjatë dhe habi të thellë, për këtë veprim të papërgjegjshëm të qytetit të Shkupit, raportojnë mediet lokale.
“Në kohën që gjithë bota mburret me emrin dhe veprën e Nënë Terezës, kur ajo është bërë identiteti dhe letërnjoftimi i vendit tonë, të mbulohen gjurmët e shtëpisë së saj dhe të pengohet mundësia e vendosjes së luleve në pllakën përkujtimore, nuk ka si lexohet ndryshe, pos si një veprim i papërgjegjshëm dhe i dëmshëm për qytetin tonë, si edhe për gjithë vendin tonë” – thuhet në komunikatë.
Më tej, ata kërkojnë nga Shkupi, që sa më shpejt ta korrigjojë këtë lëshim, t’i rikthejë themelet e shtëpisë së Nënë Terezës, ndërsa në të mirë të marrëdhënieve të mira ndëretnike, është koha e fundit që teksti në pllakën përkujtimore, të bëhet edhe në gjuhën shqipe.
“Me shpresë se, nuk do të ketë nevojë për reagime në instanca më të larta vendore dhe ndërkombëtare dhe në forma të tjera” – thotë Skender Asani, drejtor i këtij departamenti
VAZHDO TË LEXOSH MË TEPËR PËR TEMËN
‘Serbët vranë 500 000 shqiptarë’
“E pazëvendësueshme nëse je ndryshe”
