Kryeminsitri Edi Rama foli sot sërish edhe për futbollin shqiptar, ku klubet kanë bojkotuar kampionatin, teksa kërkojnë plotësimin e 4 kushteve. Sipas kreut të shtetit, kërkesa për lënin 10 vjet pa taksa të futbollistëve nuk është e mundur.
LIGJI PËR SPORTIN – “Kemi bërë një ligj për sportin dhe kemi dhënë shumë për futbollin që nuk i ka bërë askush më parë. Po që futbollistë kërkojnë 10 vjet pa taksa kjo nuk funksionon. Jemi dakord, për një periudhë starti për të formalizuar pagat.
E dimë shumë mirë që futbollistët s’paguhen me minimum jetik 230 mijë lekë si pastrueset. Këta na deklarojnë nga 230 mijë lekë pagë, marrin shumë më tepër, mijëra euro e ne s’mund dot t’ju themi s’keni taksë 10 vjet, në një botë që dhe Ronaldo e Mesi përfundojnë në gjykatë e prokurori për taksat.
LËSHIMET – Ndërkohë që patjetër një ulje fillestare, patjetër një TVSH 6% për investimet në sport, patjetër që mund të shihet e s’ka problem taksa e ndikimit në infrastrukturën sportive, por patjetër që jemi gati të bëjmë atë që duhet dhe për zinxhirin e fëmijëve.
Por ndërkohë historia e këtij futbolli me pronarë që duan të shkarkojnë nëpër klube paratë që i detyrohen shtetit si pronarë aktivitetesh të tjera nuk kalon, as historia me biznesmenë të pasur që kanë veshur fanellën e futbollit dhe kujtojnë se mund të luajnë topash me qeverinë, nuk kalon.
Gati për të gjitha, por ama ka ardhur koha që edhe mbështetjet e bashkive, direkte, për klubet profesioniste, të kalojnë në mbështetje për të tjerët, për sportin. Dakord për fëmijët që luajnë në shkollë, jemi dakord për gjithçka që bëhet për fëmijët, këto historitë me modele nga këtej e andej është mirë të mos na i tregojnë më se i tregojnë keq, i kemi parë, por në sa vjet ka shtet shqiptar, mblidhini të gjitha bashkë dhe për futbollin s’është bërë sa çfarë është bërë në këto vite.
BOJKOTI – Nuk e kuptoj dot arsyen pse këtyre u duhet bojkoti nëse nuk bëjnë një kalkulim që janë më rehat të bëjnë bojkot. Mbase janë më rehat, i japin futbollistëve një minimum real mbase, s’kanë taksirate të tjera, kjo nuk ka për të funksionuar. Duan të bojkotojnë të bojkotojnë, ata me qeverinë thjesht e vetëm të bashkëpunojnë e çfarë të marrin është mirë.
Futbolli është industri e nëse këta mendojnë se mund ta mbajnë në epokën e feudalizmit me ngastra ku hidhet e pritet topa dhe nga ana tjetër fshihen lekë, këtë mund ta bëjnë, por jo me ne”, – u shpreh Rama.
VAZHDO TË LEXOSH MË TEPËR PËR TEMËN
Përshkallëzohet bojkoti, bashkohen edhe akademitë
