Liu Jianchao, një ish-përkthyes dhe kreu i organit kryesor kundër korrupsionit në Kinë, mund të bëhet ministri i ri i jashtëm i Kinës, shkruan Wall Street Journal.
E përditshmja amerikane e biznesit shkruan se Liu, ka vizituar në fillim të muajit Uashingtonin, Nju Jorkun dhe San Franciskon.
Presidenti kinez Xi Jinping e dërgoi atje për ta testuar edhe në “ujërat diplomatike” dhe për t’i dhënë mundësinë që të prezantohej në administratën amerikane.
Përveç kësaj, Liu priti delegacionin amerikan në Pekin vjeshtën e kaluar.
Liu, beson WSJ, i ka kaluar të gjitha testet dhe pritet të marrë detyrën pas seancës së partisë në mars.
Ai do të zëvendësojë Wang Yi, ish-ministrin e Xi-t, të cilin presidenti kinez thuhet se e emëroi përkohësisht pasi pushoi papritur Qin Gang këtë verë, sipas raportimeve të mediave, për shkak të një lidhjeje jashtëmartesore.
Liu Jianchao, i cili u bë i njohur si kreu i organit kundër korrupsionit të Kinës, u takua me elitat e biznesit dhe politikës në SHBA.
Ndër të tjera, ai foli me Stephen Schwarzman dhe Ray Dalio, investitorë të njohur amerikanë dhe Antony Blinken, një koleg i mundshëm i ardhshëm, që e priti atë nga administrata e Joe Biden.
WSJ shkruan se burimet amerikane janë të sigurta se qëllimi i vizitës ishte takimi me shefin e radhës të diplomacisë kineze dhe se përshtypja që ata përcollën ishte se Liu u fokusua në uljen e tensioneve me SHBA-në dhe promovimin e projektit të infrastrukturës së Kinës “Brezi dhe Rruga”.
Disa nga njerëzit që u takuan me Liun thanë se diplomati kinez ishte shumë më i hapur se kolegët e tij në dëgjimin dhe përgjigjen e pyetjeve rreth politikës kineze ndaj vlerësuesve të huaj të rreziqeve të investimit në Kinë.
VAZHDO TË LEXOSH MË TEPËR PËR TEMËN
“Kina po përgatitet për më të keqen”
