Edhe pse shkatërruan Dortmundin me shifrat 5-0 dhe morën kryesimin e Bundesligës gjermane, në kampin e Bayern Munchen nuk ka qetësi.
Mediat gjermane raportojnë se në stërvitjen e sotme, Robert Lewandowski pati një përplasje fizike me Kingsley Coman, madje nuk kursyen as grushtet ndaj njëri-tjetrit.
Sipas “Bild”, lojtarët u goditën në fytyrë pasi kishin fyer njëri-tjetrin. Mësohet se ‘molla e sherrit’ ishte një koment nga sulmuesi polak drejt Coman dhe ky i fundit nuk e pëlqeu aspak.
U desh ndërhyrja e Niclas Sule dhe Jerome Boateng për të qetësuar gjakrat por asnjë nga futbollistët nuk tërhiqej. Ajo që habiti më shumë është se trajnieri bavarez, Niko Kovac, i lejoi të dy të vazhdonin stërvitjen në vend që të ktheheshin në dhomën e zhveshjes. Kjo i habiti jo pak lojtarët dhe drejtuesit e tjerë gjermanë.
Fitorja 5-0 e fundjavës së kaluar kundër Borussia Dortmund i ndihmoi bavarezët të parakalonin rivalët e tyre në renditje duke marrë kreun e tabelës. Kur ngelen edhe 6 ndeshje nga përfundimi i kampionatit, konflikti i Lewandowskit dhe Coman mund të prishë jo pak ekuilibrat në skuadër.
I takon trajnierit Niko Kovaç që të zgjidhë këtë çështje sa më shpejt, për të mbrojtur titullin kampion duke qenë se Dortmundi ndjekës, është një kërcënim real për bavarezët.
VAZHDO TË LEXOSH MË TEPËR PËR TEMËN
Quajeni “Ronaldo League”/ Cr7 sundon në Champions
