Kandidati kryesor për kryeministër të Britanisë së Madhe, Boris Johnson, tha se në rast të zgjedhjes si kryeministër, do të kërkojë një marrëveshje të re me Bashkimin Evropian për daljen e Britanisë nga blloku.
Mirëpo, ai paralajmëroi se nëse BE-ja refuzon kërkesat e tij, atëherë Britania do të largohet pa marrëveshje më 31 tetor.
Ish-kryediplomati britanik tha në një intervistë për BBC se pakti ekzistues i negociuar nga kryeministrja në largim, Theresa May, ka marrë fund.
“Unë premtoj se do të dalim nga BE-ja natën e halloween më 31 tetor. Miqtë dhe partnerët tanë duhet ta kuptojnë se e kemi seriozisht, dhe se jemi gati të çlirohemi nga retë e disfatizmit dhe negativitetit që na kanë mbështjellë prej kohësh,“–tha Johnson.
Kriza trevjeçare e Brexit-it mund të thellohet, pasi premtimi i Johnsonit për të lënë BE-në pa marrëveshje mund të ngjallë reagime të ashpra në parlamentin britanik, deputetët e së cilit, kanë kundërshtuar daljen e vendit nga BE-ja, pa një marrëveshje.
BE-ja ka refuzuar të rinegociojë Marrëveshjen e largimit të arritur në maj të nëntorit të kaluar me qeverinë britanike.
Parlamenti britanik e ka hedhur poshtë tri herë këtë marrëveshje.
Sipas Johnson, vendi nuk do të vuajë sa ç’përflitet në aspektin ekonomik, pasi raportet tregtare me BE-në do të rregullohen nga Organizata Botërore e Tregtisë.
Kandidati favorit për postin më të lartë qeveritar refuzoi të komentojë incidentet në jetën e private, dhe përkatësisht kontaktin e fundjavës së kaluar me policinë pas grindjes verbale me partneren në shtëpinë e tij.
Ndërkohë, një ditë më parë rivali dhe kryediplomati britanik Jeremy Hunt, theksoi se Johnson po i shmanget debateve ballë-për-ballë.
Njëri nga dy kandidatët e mbetur pritet të shpallet kryeministër dhe lider i konservatorëve në datën 22 korrik, kur do të shprehen me votë rreth 160 mijë anëtarë të Partisë Konservatore britanike.
VAZHDO TË LEXOSH MË TEPËR PËR TEMËN
“Ç’do të thoshte Churchill për Boris Johnson?”
Britani/ Boris Johnson akuzohet për mashtrim
Britanikët gjithë pikëpyetje për Boris Johnson
