Ka qenë një vit shumë i vështirë për ish-portierin e shquar të Vllaznisë, drejtues i saj dhe ish-trajner i kombëtares shqiptare të femrave në futboll, Armir Grima.
Ai u arrestua si pjesë e grupit “Bajri” në Shkodër, kaloi nëpër akuza e dyshime të forta për trukime ndeshjesh, por ditën e sotme është çliruar nga çdolloj akuze dhe është shpallur i pafajshëm.
Gjykata e Shkodrës ka pushuar çështjen ndaj tij, pasi prokuroria e këtij rrethi ka konstatuar se nuk ka bërë vepër penale. Më konkretisht, nuk provohet dot se Grima ka kryer veprën penale të shit-blerjeve të ndeshjeve të futbollit.
Dyshimet për këtë gjë e burgosën fillimisht, pastaj e lanë me masën “detyrim paraqitje” prej disa muajsh. Prej kësaj të marte, ai është qytetar i lirë dhe pa asnjë njollë mbi shpinë. Kësisoji, pritet t’i rikthehet aktivitetit normal, pse jo edhe në futboll.
Operacioni policor “Volvo 4” e përfshiu atë në akuza, bashkë me një grup të rrezikshëm kriminal, që operonte në kryeqendrën e veriut. Grima dyshohej se ishte përfshirë në trukimin e ndeshjes së Kategorisë së Parë, mes Vllaznisë B dhe Tërbunit të Pukës, gjë që nuk është faktuar dot.
Në shtator 2018, FSHF, duke parë situatën e krijuar me ish-portierin e Vllaznisë, vendosi ta pezullojë nga detyra që mbante, si trajner i kombëtares së Shqipërisë për femra, në futboll.
SHËNIM: Të gjitha rezultatet e ndeshjeve kryesore të ditës i gjeni në kohë reale, duke klikuar Konica.al në ballinën e rubrikës së sportit
VAZHDO TË LEXOSH MË TEPËR PËR TEMËN
Krimet e Rënda: “Arrest me burg” për Grimën
FSHF del me qëndrim zyrtar për Armir Grimën
