Futbollistët e Vllaznisë edhe të shtunën nuk kanë dalë në stërvitje, duke kompromentuar ndjeshëm pjesën e mbetur të sezonit, që pritet të ristartojë më 3 qershor. Kriza te Vllaznia hyri sot në ditën e tretë, pasi lojtarët kuqeblu edhe sot nuk kanë preferuar të kryejnë seancë stërvitore.
Një rast i rrallë për klubet elitare të futbollit shqiptar. Sërish në fushë dolën në orën 17:00 zv-trajneri Safet Osja dhe trajneri i portierëve Ideal Lekiqi, por më pas janë larguar pasi aty nuk ndodhej asnjë prej futbollistëve.
Çështja e pagave është kthyer në makth për lojtarët e Vllaznisë, pasi prej kohësh Këshilli Bashkiak i Shkodrës nuk ka miratuar pasqyrën financiare të vitit 2020, ku bën pjesë dhe buxheti i Vllaznisë.
Administratori i klubit Suad Lici deklaroi disa ditë më parë se nëse lojtarët nuk stërviten dhe nuk luajnë, do të aktivizohen futbollistët e Vllaznisë U19. Lojtarët e Vllaznisë kërkojnë garanci për katër rrogat e pamarra dhe mbi të gjitha një datë fikse se kur do të kalojnë paratë në llogaritë e tyre.
Gjithashtu, ata duan të sqarohen se si do të procedohet për kontratat, pasi shumicës i skadon marrëveshja me Vllazninë më 31 maj. Sipas kapitenit Lika, lojtarët janë të gatshëm të pranojnë rroga minimale në muajt qershor dhe korrik nëse klubi shlyen detyrimet e tjera.
VAZHDO TË LEXOSH MË TEPËR PËR TEMËN
Vijon bojkoti, asnjë lojtar i Vllaznisë në stërvitje
