Mbrëmë ishte Emanuele Ndoj që realizoi dy gola për Brescia-n në Serie B italiane, ndërsa sot radha ka qenë për Eduart Rrocën, heroin e Istanbulsporit në Ligën e Parë turke.
Ish-mesfushori i Luftëtarit dhe Kukësit në Kategorinë Superiore, ka realizuar dopietë në harkun kohor të 6 minuta, duke kaluar në avantazh të dyfishtë skuadrën e tij, përballë Samsunsporit në transfertë.
Pjesa e parë u mbyll me rrjeta të paprekura, teksa në minutën e 52-të, shqiptari realizoi golin e parë. Për t’i dhënë akoma më shumë magji paraqitjes fantastike të tij, 27-vjeçari tundi sërish rrugën e rrjetës në minutën e 58-të, duke ngitur shifrat në 0-2.
Goli i tretë, në fitoren 0-3 të Istanbulspor është shënuar në 90’ nga Isaah, por asistin ia dha pikërisht Roca, i cili u shpall më i miri i ndeshjes. Pas 5 javësh, kryeson me 12 pikë pikërisht skuadra e dy shqiptarëve, Roca-Abazaj, me këtë të fundit që u fut në mesin e pjesës së dytë.