Nëse Juventus nuk arrin nesër të sigurojë pjesëmarrjen në Champions League, Cristiano Ronaldo do të kërkojë largimin nga Torino, edhe pse kontrata e tij përfundon vitin tjetër.
Dy janë destinacionet e mundshme, të dy rikthime: Ose te Manchester United, ose te Sporting Lisbonë. Të dy skuadrat e kanë siguruar pjesëmarrjen në grupet e Champions dhe përmbushin ambiciet sportive të CR7.
Kuptohet, paga e tij nuk do të jetë më 30 milionë euro, sa merr aktualisht te Juventus. Nëse do t’u bashkohej anglezëve, mendohet që paga e tij të ishte diku te rreth 20 mln euro, përfshi disa klauzola.
Nëse do të shkonte te Sportingu, paga maksimale e Ronaldos nuk do t’i kalonte 5-6 milionë euro, por do të ketë një kusht: të ardhurat nga imazhi do t’i kalonin atij.
Juventus, pa Ligën e Kampionëve, do ta pranonte me kënaqësi operacionin. E para, kursen 30 milionë euro pagë. Dhe e dyta, përfiton edhe të paktën 30 milionë euro nga shitja. Jo pak, pasi të ardhurat do të binin ndjeshëm nëse bardhezinjtë nuk janë në Champions.