Një nisje shumë e mirë e sezonit në ligën e dytë në kampionatin francez nga ana e Qazim Laçit. Mesfushori i Kombëtares shënoi 2 gola në ndeshjen e parë në transfertë ndaj Toulouse.
Numri 10 i Ajaccio shënoi nga një gol në secilën pjesë, që rezultuan gola barazimi, 1-1 në pjesën e parë dhe 2-2 në të dytën. Edhe pse Ajaccio mbeti me 10 vetë nga 36’, mesfushori kuqezi gjeti dy herë rrugën e rrjetës. Laçi i dha një pikë ekipit të tij.
Gol shënoi edhe Enis Cokaj për Lokomotivën e Zagrebit. Mesfushori kuqezi realizoi golin e parë në fitoren 2-1 që skuadra e tij mori në transfertë ndaj Slaven Belupo. Gjithashtu gol shënoi edhe Kristi Qose në kampionatin cek, duke realizuar nga pika e bardhë e penalltisë.
Por nuk mbarojnë këtu golat kuqezi në ditën e sotme. Edhe Ernest Muçi e nisi me këmbën e mbarë këtë edicion në futbollin polak, pasi ka gjetur që në ndeshjen e parë të kampionatit rrugën e rrjetës me skuadrën e Legias.
Sulmuesi, i aktivizuar sot titullar në ndeshjen kundër Visla Plok, ka shpërblyer besimin e trajnerit me një gol spektakolar në minutën e 28 të takimit. Pasi mori topin në krahun e majtë, ai lëshoi një predhë të pakapshme nga 25 metra.
Duke llogaritur edhe golin e Manajt më herët me ekipin e parë të Barcelonës, sot kuqezinjtë shënuan në total gjashtë gola. Jo keq, kur kampionatet sapo kanë filluar…