Shqipëria U-19 humbet ndeshjen e parë ndaj Francës U-19, të vlefshme për kualifikueset e europianit me rezultatin 4-0, në stadiumin “Arena Egnatia”. Skuadra e Armando Cungut ishte e pafuqishme ndaj ‘Gjelave’ dhe pati shumë pak raste për shënim.
Kuqezinjtë e nisën mirë sfidën ku dhe ju anulua një gol. Ishte lojtari I Sasuolos, Asan Mata që shënoi një gol mjaft të bukur, por iu anulua sepse topi kishte dalë jashtë në momentin e pasit të fundit.
Nga ky moment lojën e kontrolluan miqtë, të cilët kaluan në avantazh me Virzhinius në minutën e 28’. Francezët shënuan dhe 2 gola të shpejtë me Albine, i cili realizoi dy herë në minutat 35’ dhe 40’. 3-0 përfundoi pjesa e parë.
Në pjesën e dytë kuqezinjtë e vegjël u përpoqën të reagonin, por nuk ia arritën dot. Në minutën e 64’ francezët shënojnë golin e katërt me Tçaouna. Sulmuesi përfitoi nga një gabim në mbrojtje dhe shënoi me penallti. Ndeshja e ardhshme do të jetë ndaj Serbisë në transfertë.