Arsenal ka pësuar një disfatë e cila mund të peshojë shumë në bilancet e sezonit, teksa topçinjtë u mposhtën në transfertë me rezultatin e pastër 3-0 ndaj Crystal Palace.
Topçinjtë nuk patën forcën e duhur për të përballuar sulmet e vendasve dhe në fraksionin e parë pësuan dy gola brenda 24 minutave, ku fillimisht ishte Mateta e më pas Ajew që ndëshkuan portierin Ramsdale.
Por, teksa pritej reagimi i të besuarve të Mikel Artetës në fraksionin e dytë, Arsenal pësoi sërish. Këtë herë Zaha ndëshkoi nga pika e bardhë Ramsdale, i cili e pati të pamundur të ndalte sulmuesin nga Bregu i Fildishtë.
Në vazhdim, Arsenal provoi me anë të Saka, Smith Rowe apo Nketiah, me këtë të fundit që u ndal nga traversa, por nuk ia dolën të ndryshonin fatet e takimit.
Pas kësaj disfate, Arsenal vendos në rrezik objektivin për vendin e katërt, pozicion të cilin aktualisht e ka humbur ndaj Tottenham, por ka një ndeshje më pak se Spurs ndërsa gjendet e pesta me 54 pikë. Nga ana tjetër, Crystal Palace mban vendin e nëntë me 37 pikë.
VAZHDO TË LEXOSH MË TEPËR PËR TEMËN
Tottenham me “5 yje”, kap zonën Champions
Manchester United ndalet, Champions edhe më larg
City “replikon” me Liverpool, mposhtet Chelsea
