Kosova ka marrë fitoren e dytë në grup në kuadër të Ligës së Kombeve, duke mposhtur 3-2 Irlandën e Veriut në stadiumin “Fadil Vokrri” në Prishtinë. Një sukses që vlen shumë.
Ishte Vedat Muriqi që kaloi në avantazh Dardanët në minutën e 9-të, gol që iu dedikua të madhit Fadil Vokrrit, që mbante pikërisht këtë numër dhe që u nda nga jeta 4 vite më parë.
Dhjetë minuta më pas Zymer Bytyqi shënoi golin e dytë për vendasit pas një krosimi perfekt të Rashicës. Megjithatë, miqtë irlandezë ngushtojnë shifrat në fundin e pjesës së parë.
Me nisjen e pjesës së dytë Kosova shënon sërish dhe është përsëri Muriqi ai që realizon, kësaj here me asistin e Kastratit. Irlanda e Veriut ngushton në 3-2 në 83’, por pa qenë në gjendje të shkojë më shumë. Kosova mban vendin e dytë në grup.
Vendin e parë e mban Greqia, që mori fitoren e tretë radhazi, teksa mposhti 3-0 Qipron. Duket se gara në grup është vetëm mes Greqisë dhe Kosovës për kreun, me Dardanët që duhet të “qajnë” humbjen në shtëpi me helenët.