Teksa Boris Johnson përgatitet të largohet nga posti pas një humbjeje poshtëruese të besimit nga vetë Partia e tij Konservatore, shumica në Mbretërinë e Bashkuar pranojnë se ai lë një trashëgimi të çuditshme, të përcaktuar nga pandershmëria dhe skandali.
Megjithatë, nuk është kështu në Ukrainë.
Në një telefonatë të enjten e kaluar, pasi Johnson dha dorëheqjen, Presidenti Volodymyr Zelenskyy i tha atij: “Ne të gjithë e dëgjuam këtë lajm me trishtim. Jo vetëm unë, por edhe e gjithë shoqëria ukrainase.”
44-vjeçari vazhdoi: “Nuk kemi dyshim se mbështetja e Britanisë së Madhe do të ruhet, por lidershipi dhe karizma juaj personale e bënë atë të veçantë. ”
Si u bë Johnson kaq popullor në Ukrainë?
Sipas Sofiya Cheliak, një gazetare nga Lviv, deri në vitin 2022, politika britanike ishte një shqetësim i largët për publikun ukrainas.
“Ukrainasit që donin të integroheshin në BE nuk e kuptuan plotësisht Brexit-in”, tha ajo për Al Jazeera, duke iu referuar largimit historik të Mbretërisë së Bashkuar nga blloku.
Por kjo ka ndryshuar këtë vit. Që nga pushtimi rus në fund të shkurtit, Johnson ka qenë një nga mbështetësit më të zëshëm ndërkombëtarë të Ukrainës. Ai foli kundër agresionit rus përpara fillimit të pushtimit dhe pasi Moska filloi luftën e saj dhe ka vazhduar të shprehë mbështetjen për Ukrainën në terma luftarakë.
Kjo përkrahje është shoqëruar me mbështetje financiare: sipas një deklarate të qeverisë britanike, Mbretëria e Bashkuar ka njoftuar 2.3 miliardë paund (2.77 miliardë dollarë) mbështetje ushtarake për Ukrainën që nga shpërthimi i luftës – më shumë se çdo vend tjetër përveç Shteteve të Bashkuara..
Rëndësia e kësaj mbështetjeje është filtruar dhe më pas përcjellë tek qytetarët ukrainas.
“Boris shihet në Ukrainë si aleati më i rëndësishëm, sepse në momentin kur ne kishim nevojë për mbështetje ai ishte atje,” tha Vira Kostenko-Kuznetsova. “Për shkak se ai ka këtë personalitet, njerëzit po e ndjekin. Boris është një mik i mirë që njerëzit e pëlqejnë vërtet.”
Në prill, Johnson u bë një nga liderët e parë botërorë që vizitoi Kievin.
Disa vunë në dyshim motivimin për udhëtimet e tij në Ukrainë dhe telefonatat shumë të trumbetuara me Zelenskyy.
Dihet mirë se idhulli i Johnson-it është Winston Churchill, dhe ai është akuzuar jo vetëm se është përpjekur të imitojë këtë lider heroik të kohës së luftës, por se ka përdorur luftën në Ukrainë si një shpërqendrim nga skandalet, polemika dhe kriza ekonomike në MB.
Megjithatë, udhëtimi i parë i Johnson në Kiev ishte një lëvizje që, të paktën në Ukrainë, e bëri atë të dukej si një aleat i palëkundur në imagjinatën publike.
“Ai mori mbështetjen më të madhe kur erdhi në Kiev menjëherë pas de-okupimit të rajonit të Kievit,” thotë Cheliak. “Në sfondin e liderëve të tjerë botërorë, ai dukej si një superhero që erdhi për të dëshmuar heroizmin tonë. Sigurisht, gjesti mund të duket shumë i thjeshtë jashtë vendit, por për shumicën e ukrainasve, ai shtoi shpresën për fitore dhe u bë një mbështetje e jashtëzakonshme morale.”
Pamja e dobët dhe personaliteti bombastik i Johnson janë vlerësuar prej kohësh si një pjesë kyçe e popullaritetit të tij në Mbretërinë e Bashkuar, dhe e njëjta gjë vlen edhe në Ukrainë.
Ai ka qenë subjekt i memeve në mediat sociale ukrainase dhe kur lajmi për dorëheqjen e tij u publikua javën e kaluar qrkulluan meme që tregonin Johnson me një pasaportë ukrainase.
“Ai është paksa i çuditshëm, por në të njëjtën kohë shumë karizmatik dhe një politikan i fortë”, tha Olha Harbovska, një menaxhere komunikimi nga Ukraina perëndimore.
“Ai është paksa i çuditshëm, por në të njëjtën kohë shumë karizmatik dhe një politikan i fortë”, tha Olha Harbovska, një menaxhere komunikimi nga Ukraina perëndimore.
Një sondazh i fundit nga Lord Ashcroft zbuloi se 90 për qind e ukrainasve kishin një pikëpamje pozitive për Johnson, duke e vendosur atë vetëm tre pikë prapa Presidentit Zelenskyy – dhe shumë mbi Emmanuel Macron.
Në muajt e fundit, disa qytete ukrainase kanë propozuar emërtimin e rrugëve me emrin Johnson, dhe javën e kaluar qyteti i Odesa e quajti atë një Kozak nderi.
Ndërsa Mbretëria e Bashkuar hyn në një fushatë të furishme të lidershipit konservator, në Ukrainë ka disa shqetësime për atë që mund të vijë më pas dhe nëse mbështetja e gjerë ushtarake e MB do të vazhdojë.
Aktualisht, shumica e analistëve ranë dakord se strategjia e Mbretërisë së Bashkuar për Ukrainën nuk ka gjasa të ndryshojë.
Politikanët e të gjithë spektrit mbështesin Ukrainën, dhe në të vërtetë, angazhimi i Mbretërisë së Bashkuar për të ndihmuar vendin të qëndrojë kundër Rusisë i paraprin postit të kryeministrit Johnson – në vitet që kur Rusia aneksoi ilegalisht Krimenë në 2014, MB i ka dhënë ushtrisë ukrainase udhëzime dhe trajnime, dhe në vitin 2016, të dy vendet nënshkruan një marrëveshje 15-vjeçare bashkëpunimi në fushën e mbrojtjes.
“Pavarësisht gjithçkaje, ukrainasit kanë besim në mbështetjen e Britanisë së Madhe, ne shpresojmë që qeveria britanike, parlamenti dhe populli të mos ndryshojnë qëndrimin e tyre, pavarësisht se kush do të jetë lideri”, tha Cheliak.
Sido që të jetë, disa njerëz janë ende të trishtuar për largimin e Johnson.
“Njerëzit janë të trishtuar për faktin se ai duhej të largohej për të qenë i sinqertë,” tha Kostenko-Kuzentsova. “Unë personalisht, jam pak e trishtuar sepse nëse keni një shok dhe ju pëlqen vërtet, thjesht dëshironi që ai të jetë mirë.”
Burimi: Al Jazeera
Përktheu dhe përshtati: Konica.al
