Kombëtarja shqiptare e futbollit duket se në sulm ka të ardhme të sigurtë. Janë të paktën 3 sulmues cilësorë të rinj që luajnë me skuadrat më prestigjoze të botës.
Natyrisht, nuk luajnë me skuadrat e para, por mundësitë që të rriten dhe të marrin eksperiencë janë të mëdha. Rey Manaj, vetëm 22 vjeç, është pjesë e Barcelonës.
Të mërkurën ai u stërvit me të njëjtin grup ku ishte edhe Messi. Mund të ishte i gatshëm për Kupën e Mbretit, por trajneri Setien nuk rrezikoi dhe futi të gjithë titullarët.
Duket se karriera e Manajt është në ulje, pasi ai më parë ishte pjesë e Interit dhe tashmë luan te Barcelona B, por duke parë moshën, ai mund të luajë sërish në një ekip të madh. 12 ndeshje me Kombëtaren dhe 2 gola, e bëjnë atë një lojtar të së ardhmes.
I dyti është Armando Broja, pjesë e Chelsea. Luan me ekipin U-19, por shpesh edhe për U-23. Edy Reja pritet ta grumbullojë me ekipin e parë kombëtar, por gjithashtu edhe Lampard në verë do ta marrë tek ekipi i tij. Vetëm 19 vjeç, në 26 ndeshje ka shënuar 16 gola, shifra që flasin për një talent kuqezi.
I fundit është Xhakomo Vrioni. Që nga dje ai është bërë pjesë e Juventus. 21 vjecari shqiptar nuk do të ketë mundësinë për momentin të jetë përkrah Ronaldos me shokë, ai do të luajë me U-23.
Vrioni është grumbulluar me Kombëtaren, ndërsa tashmë pret debutimin si kuqezi. Kurrë më parë sulmuesit e Kombëtares nuk ishin pjesë e klubeve kaq prestigjoze. I fundit ishte Igli Tare që luajti me Lazion, por atëherë ishte në perëndim të karrierës.
VAZHDO TË LEXOSH MË TEPËR PËR TEMËN
Manaj stërvitet me Messin, gati për Kupën
“Kur më kërkoi Barça, nuk doja asnjë tjetër”
