Largimi i grupeve bankare europiane nga Shqipëria po sjell shitje të bankave me çmime mjaft modeste. Kështu, të gjitha shitjet e bankave në tregun shqiptar janë bërë për vlera më të ulëta se kapitali aksioner i bankave.
Shitblerja e parë që u zyrtarizua këtë vit ishte ajo e NBG Bank. Vlera nuk u bë publike, por besohet se shitja u bë për një vlerë pak më të lartë se 25 milionë euro. Vlera e kapitalit në momentin e shitjes ishte 7 miliardë lekë ose rreth 55 milionë euro.
Sipas marrëveshjes, NBG e përgjysmoi kapitalin e saj në 3.5 miliardë lekë, çka do të thotë se grupi rimori gjysmën e kapitalit. Megjithatë, edhe vlera e mbetur e kapitalit aksioner besohet se ishte paksa më e lartë në raport me çmimin e blerjes.
Të njëjtën rrugë ndoqi edhe Tirana Bank, që u shit te grupi Balfin dhe Komercijalna Banka për 57 milionë euro. Por, ndërkohë, kapitali i bankës në momentin e shitjes ishte rreth 108 milionë euro. Edhe Tirana Bank e zvogëloi kapitalin me 28 milionë euro, por, sërish vlera e mbetur e kapitalit aksionet prej 80 milionë eurosh është shumë më e lartë se çmimi i shitjes.
Në muajin gusht, banka Societe Generale njoftoi shitjen e filialit shqiptar te hungarezët e OTP, për 32.5 milionë euro. Por, ndërkohë, në fund të tremujorit të tretë të këtij viti, kapitali i Societe Generale Albania ishte 8 miliardë lekë ose rreth 65 milionë euro.
Banka më e fundit e shitur në tregun shqiptar është Banka Ndërkombëtare Tregtare. Vlera e shitjes së bankës malajziane te Union Bank ishte rreth 9 milionë dollarë amerikanë. Por, ndërkohë, në fund të muajit shtator kapitali aksioner i bankës ishte rreth 1.1 miliardë lekë ose rreth 10.2 milionë dollarë.
Arsyeja e shitjeve të aksioneve në vlerën nominale aktuale lidhen me dëshirën e investitorëve për t’u larguar, por, në disa raste, edhe me gjendjen problematike të bilanceve, që ngelen të rënduara nga kreditë me probleme.
VAZHDO TË LEXOSH MË TEPËR PËR TEMËN
Union Bank blen Bankën Malajziane
Zhbllokohet shitja e Societe Generale
