Pas katër rezultateve pozitive radhazi, me 2 barazime dhe 2 fitore, Milan është rikthyer te humbja, teksa është mposhtur 5-0 në Bergamo nga Atalanta.
Zikaltrit bergamaskë janë rikthyer menjëherë te suksesi dhe tani mund të shpresojnë sërish te vendi i katërt, ashtu si në sezonin e kaluar, kur siguruan për herë të parë pjesëmarrjen në Champions.
Ishte Gomez ai që realizoi shpejt për vendasit, që në minutën e 10-të. Pjesa e parë ishte e luftuar, por kuqezinjtë nuk ishin konkretë në rastet para porte.
Në të dytën, në harkun kohor të dy minutave, në 61’ me Pasalic dhe 63’ me Ilicic, Atalanta thuajse zgjidh ndeshjen. 3-0 dhe më pas kontrollon ndeshjen.
Për t’i dhënë goditjen përfundimtare mendon sërish Ilicic, që në 72 con shifrat në 4-0. Por nuk do të përfundonte këtu, pasi Muriel, i sapofutur në lojë shënon edhe golin e pestë. Gjimshiti ishte titullar në mbrojtje për Atalantën.