Shumë futbollistë, sidomos ata që vijnë nga bota e tretë, vuajnë për të ndërtuar një karrierë edhe kur kanë talent. I tillë është edhe rasti i mesfushori Thomas Partey, por që ka shijuar një ngritje meteorike në karrierën e tij, duke pasur parasysh se ai erdhi nga një vend i largët dhe i varfër si Gana, ku ekzistenca e tij ishte në pyetje.
Tani është një shtyllë kryesore në skuadrën e Atleticos Madrid. Partey i ka siguruar trajnerit Diego Simeone se nuk dorëzohet asnjëherë dhe për këtë arsye vlerësohet shumë nga tekniku argjentinas, që habitet nga përkushtimi.
Mesfushori ganez tashmë po impresionon me paraqitjet e tij në fushë, ndonëse ky edicion që nga muaji mars është i pezulluar shkaku i koronavirusit. Paraqitjet e 26-vjeçarit kanë zgjuar interesin e skuadrat e mëdha të Evropës, të cilat e kanë projektuar futbollistin e skuadrës kryqytetase si objektivin kryesor të kësaj vere.
Është babai i futbollistit që ka konfirmuar se djali i tij është në negociata me shumë klube dhe me shumë gjasa në fund të këtij edicioni do të largohet nga Atletico Madrid, ekip me të cilin ka kontratë deri në vitin 2024.
Në fakt, ishte babai ai që ndihmoi të birin të ndjekë ëndrrën për t’u bërë futbollist, teksa shiti të gjitha pronat e tij familjare, në mënyrë që Thomas të merrte vizën për të udhëtuar në Spanjë për prova.
“Të gjitha ia kam borxh babait. Ai shiti gjithçka, pasi besonte se unë një ditë do të bëhesha futbollist”, – ka pranuar Partey. “Gjithashtu, hapat e parë në futboll i kam marrë prej tij”.
I lindur në qytetin e varfër Crobo Odumasse më 1993, Partey ishte më i madhi prej tetë fëmijëve të tjerë në familje. Nëna e tij punonte si një tregtare e vogël, ndërsa babai i tij ishte një trajner futbolli në një ekip lokal. Kështu që, ishte më se e natyrshme që Thomas qysh nga fëmijëria do të luante vetëm futboll.
Ai hapat e parë i nisi tek ekipi i babait, për të cilin edhe luante përkrah vëllait të tij, Frances. Ata të dy e panë futbollin si një shteg për një jetë larg nga lagjet e tyre. Thomas iu dha nofka “Senegali” nga babai i tij, sepse e kujtonte atë në një mik të tij që e kishte të njëjtin emër.
Në familjen Partey e shihnin Thomasin si futbollist, por kushtet ishin të vështira. Ndërsa ai vazhdoi të zhvillonte talentin e tij, ai filloi me ëndrrat për të udhëtuar në Evropë. Duke ditur se djali i tyre ishte i bekuar me talent, prindërit e tij u përpoqën të mbledhin para për udhëtimin e tij në futboll, duke kërkuar sponsorë në rast se të vinte një mundësi jashtë vendit.
Sidoqoftë, familja dështoi në ngritjen e fondeve dhe u detyruan të mendojnë për mjete të tjera. “Ishin kohë të vështira, pasi ishim shumë të varfër, por unë besoja në ëndrrën time dhe doja ta testoja veten diku në Evropë. Nuk ishte aspak lehtë të shohësh prindërit duke bërë të pamundurën për të mbledhur paratë”, – ka kujtuar futbollisti i Atleticos, që sot ka përmbushur ëndrrën.
VAZHDO TË LEXOSH MË TEPËR PËR TEMËN
Didier Drogba, afrikani me më shumë trofe
Më 1998 mblidhte kanaçe, më 2018 kampion bote
“Jetova me 20 € në javë, mamaja më dha kurajo”
