Kreu i Këshillit Europian, Donald Tusk, deklaroi sot se Parlamenti Europian duhet të jetë i hapur ndaj idesë së shtyrjes së procesit Brexit për një kohë të gjatë, nëse Britania e Madhe e kërkon këtë gjë.
Tusk tha se miliona britanikët gjithmonë e më shumë po shprehen kundër daljes së vendit të tyre nga Bashkimi Europian. Ndërkohë, ligjvënësit anglezë do të diskutojnë alternativat si duhet të zgjidhet ngërçi tani që parlamenti ka kontroll më të lartë mbi procesin.
Presidenti i Këshillit Europian paralajmëroi edhe se Britania e Madhe mund të marrë pjesë në zgjedhjet europarlamentare që zhvillohen në maj të këtij viti.
Duke folur nga Strasburgu përpara kolegëve të tij, zyrtari i lartë tha të mërkurën se ky skenar do të nënkuptonte zgjatjen e Brexit përtej datave të dakordësuara, përkatësisht 22 majit, nëse këto ditë parlamenti britanik i jep dritën jeshile marrëveshjes paraprake.
Tusk kërkoi përkrahje edhe mes euroskeptikëve që kjo ide të realizohet, përndryshe miliona britanikë që këmbëngulin kundër procesit Brexit do të ndiheshin të braktisur.
“Nuk mund të tradhtoni gjashtë milionë persona që firmosën një peticion për revokimin e Brexit, apo një milion veta që marshuan për një referendum të ri, apo numrin gjithnjë e në rritje të personave që duan që vendi i tyre të qëndrojë në Bashkimin Europian. Ata mbase nuk ndjehen të përfaqësuar sa duhet nga qeveria angleze, por duhet të përfaqësohen nga ju këtu, sepse janë europianë.” tha Tusk.
Kreu i Këshillit Europian përsëriti megjithatë se pa konsensusin e parlamentit anglez, vendi rrezikon të dalë nga BE më 12 prill në mënyrën më të vështirë.
Komentet e tij erdhën pak orë përpara se ligjvënësit britanikë do të mblidhen për të diskutuar një sërë alternativash që i japin zgjidhje ngërçit disamujor dhe që nisin nga anulimi tërësor i Brexit deri tek largimi nga Bashkimi Europian pa marrëveshje.
Në lidhje me peticionin për revokimin e Brexit tanimë të firmosur nga rreth gjashtë milionë qytetarë, qeveria angleze u shpreh të martën se kjo temë do të diskutohet javën e ardhshme, së bashku me dy peticione të tjera për mbajtjen e një referendumi të ri dhe për daljen pa marrëveshje nga BE.
VAZHDO TË LEXOSH MË TEPËR PËR TEMËN
BE kërkon ‘ndihmë’ nga Afrika për çështjen e emigracionit
Brexit, Tusk: Pak shpresa për marrëveshje në samit
“Brexit mund të shtyhet”
