Pasditen e sotme 23 emigrantë nga vendet e Lindjes së Mesme, janë ndaluar nga shërbimet e policisë kufitare në Devoll, pasi ata kishin hyrë ilegalisht në territorin shqiptar.
Emigrantët u ndaluan në qytetin e Bilishtit dhe pas kryerjes se procedurave ne Drejtorinë e Kufirit, janë dërguar ne qendrën e azilkërkuesve në Babrru të Tiranës.
Dyshohet se emigrantët janë nga Siria dhe kanë hyrë nga pika kufitare e Kapshticës.
Nuk dihet nëse destinacioni i tyre ka qenë Shqipëria apo e kanë përdorur vendin tonë si rrugë kalimi për në vendet e BE.
Mësohet se vetëm tre ditët e fundit në zonën e Devollit janë kapur 56 refugjatë.
Pasi i është marrë deklarimi nga ana e policisë klandestinët janë dërguar drejt qendrës së azilkërkuesve në Tiranë.
Kujtojmë se datën 8 gusht janë ndaluar 16 emigrantë që ishin nisur prej Sirisë dhe Irakut për të kaluar drejt vendeve të BE, ndërsa në datën 3 gusht janë ndaluar dhe 14 të tjerë.
Edhe Komisioni Evropian ka marrë në diskutim situatën e krijuar. Për këtë qëllim u propozua dhe prezenca e 30 forcave të Fronteks në kufirin mes Shqipërisë dhe Greqisë.
Por dhe mes vendeve të BE debati ka mbetur i hapur, pasi propozimi për shpërndarjen e drejtë të azilkërkuesve dhe ideja e qëndrimit në vendin e parë mbeten molla e sherrit për shtetet më të mëdha të unionit .
