Zëvendëskryeministri i Kosovës, Fatmir Limaj, i cili së fundi është propozuar nga Qeveria si kryesues i ekipit negociator në dialogun me Serbinë, ka thënë se është i gatshëm që t’ia dorëzojë opozitës çështjen e dialogut.
Deri më sot bisedimet i ka zhvilluar institucioni i presidentit, ndërsa me votimin e ekipit negociator nga Kuvendi i Kosovës, sipas Fatmir Limajt Kosova do të pozicionohet qartë.
Kështu Limaj i ka bërë thirrje opozitës që të bashkohet në këtë çështje, të cilën ai e quan jetike për të ardhmen e Kosovës.
Fatmir Limaj tha se Kosova është kundër ndryshimit të kufijve, ndërsa foli edhe për themelimin e Asociacionit të Komunave me Shumicë Serbe(Zajednicës) ku u shpreh se nuk do të pranohet asnjëherë një Republikë Serbe brenda Kosovës.
Fatmir Limaj foli edhe për sa i përket transformimit të Forcës së Sigurisë së Kosovës në Forca të Armatosura. Ai paralajmëroi që së shpejti do të ketë lajme të reja në lidhje me këtë çështje.
