Të përshkosh me not distancën nga Butrinti në Korfuz. Kjo është “çmenduria” e 57 notarëve të moshave të ndryshme nga Anglia, Franca, Greqia dhe mes tyre edhe një nga Shqipëria.
Qejflinjtë e detit janë mbledhur për të marrë pjesë në Garën e Parë Ndërkombëtare të Notit që zhvillohet në vend, organizuar nga Agjensia e Bregdetit dhe kompania e jahteve BWA.
Distanca që do të përshkojnë konkurentët, ku nuk ka vetëm notarë profesionistë është rreth 2 kilometra, më e afërta mes dy brigjeve.
Bashkë me notarët, pjesë e nismës janë edhe 30 persona të tjerë, personel ndihmës, mjekë etj që do të asistojnë aktivitetin.
Auron Tare, drejtor i Agjensisë së Bregdetit e sheh këtë aktivitet si: “Një promovim të shkëlqyer të dy brigjeve kaq larg dhe afër në kontekstin historik. Distanca që përshkohej gjatë kohës së komunizmit nga ata që arratiseshin, pra kjo ngushticë e shkurtër ka ndarë para viteve 90-të dy vende, dy botë, dy sisteme.”
