Shqipëria dyfishoi vitin e kaluar eksportin e vajit të ullirit. Gjatë vitit 2017 janë eksportuar 113 tonë vaj ulliri, në rritje me më shumë se dy herë krahasuar me vitin 2016, kur ishin eksportuar vetëm 50 tonë. Prodhuesit konfirmojnë se kërkesa në tregjet e huaja është e lartë.
Nga objektivi i vendosur në vitin 2012 për mbjelljen e 50 milionë rrënjë ullinj, me qëllim shfrytëzimin e natyrës dhe prodhueshmërinë e tokës shqiptare që e bën tërësisht të lehtë kultivimin, sot jemi shumë larg. Vitet e fundit, subvencionet shtetërore nuk e kanë pasur prioritare mbështetjen e kësaj kulture.
Shqipëria ka aktualisht 11 milionë pemë ulliri, ku pothuajse ½ çdo vit nuk ka prodhimtari. Degradimi i ullishteve ndodh nga mosmirëmbajta për shkak të migrimit dhe emigrimit apo dhe nga mosmirëmbajtja në mënyrë profesionale që kanë çuar këtë kulturë në luhatje të theksuara prodhimi.
Mesatarja e prodhimit të ullirit aktualisht është 90-100 mijë ton ullinj në vit, ndërsa mesatarja e prodhimit të vajit shqiptar është 17-20 mijë ton vaj ulliri në vit.
Kultivimi i ullirit dhe prodhimi i vajit të ullirit është i bazuar kryesisht në biznese familjare. Sipas të dhënave nga Shoqata Shqiptare e Vajit të Ullirit, Shqipëria ka rreth 450 fabrika përpunimi ulliri për vaj dhe nga këto vetem 2/3 janë të regjistruara.
VAZHDO TË LEXOSH MË TEPËR PËR TEMËN
