Objektivat e planit mbi menaxhimin e Nivicës, mbeten dy dhe si të tilla janë: përmirësimi i jet ë banorëve dhe zhvillim i agroturizmit.
Dokumenti që paraqet mënyrën sesi do të zhvillohet ky rajon në 10 vitet e ardhshme, duke realizuar dy objektivat e lartpërmendur, është prezantuar nga koordinatori i “Projektit Nivica”, Auron Tare, si dhe nga kryetari i Bashkisë së Përmetit.
Në një rrëfim për “National Geographic Explorer”, e cila e ka përfshirë këtë zonë në serinë e radhës të dokumentarit, “Vende dhe njerëz që frymëzojnë”, si një model për t’u mbështetur dhe promovuar, Auron Tare tregon:
“Takimi në sheshin e fshatit Nivicë është një bisedë, debat me banorët e zonës për planin e menaxhimit, një dokument ku kemi përmbledhur të gjitha punimet që kemi bërë vitin e kaluar me ekspertë nga Holanda dhe Shqipëria në disa aspekte të jetës së fshatit si arkitektura, agrobiznesi, agroturizmi dhe mbetjet urbane”.
Projekti mes të tjerash përmban edhe përmirësimin e kushteve të jetesës për banorët e zonës, duke filluar nga trajtimi i mbetjeve apo ujërave të zeza deri tek shfrytëzimi i energjive të rinovueshme dhe pamja që do të kenë banesat.
“Ndërkohë që njerëzit vijnë në fshat, normalisht që krijohen më shumë mbetje. Pra si do të zgjidhet kjo, po me ujërat e zeza, trajtimin e ujërave të bardha, si të përdoret energjia e rinovueshme, të gjitha këto çështje si dhe dizenjimi i shtëpive. Si do të duhet të duken shtëpitë në të ardhmen?
I kemi studiuar të gjitha, arkitekturën, mbetjet që kemi gjetur, gjurmët nga koha kur fshati u dogj në 1913. Nga ajo që kishte mbetur filluam të shohim se çfarë pame kishin pasur shtëpitë si dhe u frymëzuam nga ambienti përreth.
Kështu që krijuam 5-6 modele për shtëpitë, pra këto shtëpi do të marrin këtë pamje sipas dizajnit që do u pëlqejë fshatarëve.
U kemi shpjeguar gjithashtu se nga ky çast dhe në vijim këto dizenjo do të jenë pamja e fshatit”, shpjegon koordinatori i Projektit Nivica.
Në përfundim të përpilimit të plotë të këtij plani, ai do t’i paraqitet pushteti vendor në mënyrë që të aplikohet sa më mirë dhe të jetë i qëndrueshëm.
“Pra të gjitha këto janë përmbledhur në këtë dokument që është një plan menaxhimi.
Ky do të ripunohet sërish dhe do ia paraqesim pushtetit vendor që më pas do ta paraqes në këshillin bashkiak që të kthehet në një lloji ligji lokal.
Kjo do të thotë se vizioni për 10 vite i këtij rajoni do të jetë në këtë dokument dhe më pas do të përpiqemi ta implementojmë atë në terren”, thotë Tare.
“Sigurisht që është sfiduese, sigurisht që ka shumë për të bërë, por është një fillim i mirë sepse u prit shumë mirë nga banorët e fshatit dhe po e shohim si një model për të gjithë rajonin”, përfundon ai.
