Një delegacion me gjashtë anëtarë i Komisionit të Venecias kanë mbërritur sot në Tiranë për t’u njohur me propozimet e opozitës për Vetingun në Politikë.
Delegacioni përbëhet nga; Veronika Bilkova, Artemiza-Tatiana Chisca, James Hamilton, Jorgen Steen Sorensen dhe Hanna Suchocka.
Në axhendë janë planifikuar takime me përfaqësuesit e shumicës dhe opozitës. Takimet në Shqipëri do të nisin sot me Vasilika Hysin, më pas me kryetarët e grupeve parlamentare, Taulant Balla, Edmond Spaho dhe Petrit Vasili.
Më pas delegacioni do të vijojë takimet Presidentin, ministren e Drejtësisë dhe ambasadorin e BE. Ndërsa nesër do të ketë takime me kryetarin e Gjykatës Kushtetuese, kryetarin e ILDKPKI, Ganaj dhe kreun e EURALIUS, Agnes Bernhard. Anëtarët e grupit do të njihen më konkretisht me propozimin e opozitës, që synon kalimin në sitë të të gjithë të politikanëve.
Por si nisi historia e propozimit të PD?
Në datë 7 shtator Partia Demokratike depozitoi në Kuvend një draft me propozimet për Vettingun në Politikë, por në asnjërën nga pikat nuk përmend vettingun për familjarët e politikanëve.
Kryeministri Edi Rama u shpreh se propozimi do të dërgohet në Komisionin e Venecias për rekomandim pasi dublon reformën në drejtësi, por nëse do të bëhet, shtoi ai, duhet të përfshijë edhe familjarët e politikanëve. Pak javë më parë ishte kryetari i Kuvendit, Gramoz Ruci që përmes një letre i kërkoi komisionit mendimin përmes 8 pyetjeve.
Tashmë delegacioni vjen në Tiranë për t’u njohur nga afër me propozimet dhe qëndrimet e palëve politike, ndërsa nisma e opozitës do të shqyrtohet në Komisionin e Venecias në datë 15 dhjetor.
VAZHDO TË LEXOSH MË TEPËR PËR TEMËN
