Rritja e pragut të xhiros vjetore, nga 80 milionë në 140 milionë lekë për biznesin e vogël, gjë që ka ulur nga 15% në vetëm 5% tatim-fitimin për këtë fashë që nga janari 2019, po shihet si një impuls i ri në modernizimin dhe zgjerimin e biznesit.
Kompani të vogla tani mund të kapërcejnë në nivelin tjetër, falë zgjerimit të aktivitetit si rezultat i uljes trefish të tatim-fitimit, ulje që shkon për investime në teknologji, apo në drejtim të fuqisë punëtore. Një prej shembujve tipikë të këtyre bizneseve, që premtojnë një rritje të tillë, u vizitua sot nga Kryeministri Edi Rama.
“Ne merremi me prodhimin e dyerve dhe të dritareve, qoftë të aluminit, qoftë të plastikës. Jemi eksportues për vendet jashtë, për Italinë, Gjermani, Zvicër. U bë një vit e gjysmë që kemi investuar në drejtim të makinerive, duke rritur cilësinë, shpejtësinë për prodhimin për të gjitha. Janë të gjitha të reja, sepse na ndihmon shumë në cilësi. Të zotërosh tregun është cilësia. Jemi një nga kompanitë që jemi certifikuar për të hyrë në tregjet europiane, se pa certifikata nuk kemi ku shkojmë,” shprehet përfaqësuesi i kompanisë.
“Tani do na ndihmojë shumë ajo ulja që keni aplikuar me 5%. Shpresojmë që do vazhdojmë të rritemi, se deri tani po rritemi gradualisht. Asistenca që ka dhënë qeveria me uljen e tatim-fitimit do të na ndihmojë. Atë pjesë do ta investojmë, do marrim fuqi punëtore,” deklaroi përfaqësuesja e kësaj kompanie.
Kryeministri Rama nënvizoi se kompanitë e vogla tashmë duhet të përfitojnë për të kapërcyer në statusin e biznesit të madh, pasi ky nivel taksimi, vetëm 5% për 91% të biznesit në Shqipëri, është më i ulëti në të gjithë rajonin.
“Ulja trefish e taksës është stimul i madh, sepse i bie që është një 10% që shkon për investime të brendshme të nevojshme, edhe për rritje të punësimit. Sigurisht, nëse ju fuqizoheni më shumë, rritet më shumë volumi dhe rritet fitimi, do paguani 15%, se ne duam që të bëheni të mëdhenj. Ne kemi arritur të shkojmë në një nivel taksimi që është më i ulëti absolut në rajon. Janë 91% e kompanive në total të Shqipërisë që paguajnë 5% tani tatim-fitimin deri në 140 milionë të xhiros. Nuk e ka asnjë. Mirëpo ne na intereson shumë kjo për punësimin dhe për vetëpunësimin, se në fillim ishte e pamundur ta bënim, për shkak të shtrëngesave që kishim, por duke u krijuar më shumë mundësi, kjo zona nga 80-140 milionë është zonë shumë interesante nga pikëpamja e fillimit të një procesi sofistikimi të biznesit,” u shpreh ndër të tjera Kryeministri Rama.
Ministri i Financave dhe Ekonomisë, Arben Ahmetaj tha se janë një sërë lehtësish dhe komponentësh që kanë ndihmuar kompani tipike të vogla si kjo, që të rriten dhe pse jo, të marrin statusin e biznesit të madh në të ardhmen.
“Këta janë ndihmuar si kompani nga AIDA për t’u certifikuar. Certifikimi iu ka dhënë mundësi që të fillojnë eksportin. Eksporti po i jep mundësi që të zgjerohen dhe qëllimi i tyre nuk është të ngelen te 140-shi. 140 është shkallë për të kapërcyer aty ku praktikisht ne synojmë, te ai industrializimi i vogël që flasim edhe në programin e mazhorancës, edhe të qeverisë. Praktikisht këta janë impuls i vogël i atij industrializimi,” u shpreh Ahmetaj.
Një problem që nuk mund të mos shqetësonte as këtë kompani është ai i punonjësve të kualifikuar. “Punonjës të kualifikuar është pak e vështirë për të gjetur për tregun tonë, por do përpiqemi. I marrim pa njohuri në fillim dhe përpiqemi t’i trajnojmë vetë,” u shpreh përfaqësuesja e kompanisë.
“Ne kemi filluar një skemë të re për punësimin, – nënvizoi Kryeministri, – për ta vënë në dispozicion të kompanive direkt për trajnime, në mënyrë që ju të keni mundësi të kompensoni në njëfarë mënyre atë pjesën bosh që ju mbetet, sepse të marrësh një punonjës të pakualifikuar komplet duhet ta paguash. Ta paguash dhe s’të jep rendiment, të kushton për aq kohë sa ta përgatisësh. Por kjo është gjëja që është një problem shumë i madh, se, realisht, e vërteta është që kudo, në çdo kompani ka vende pune, por s’ka krah pune të kualifikuar. Ne i kemi stërmbushur universitetet me vite e vite të tëra dhe kemi lënë zbrazëti në fushën e arsimit profesional. Tani këto vite ka filluar kthesa.”
Ndërsa ministri Ahmetaj shtoi se do të jenë 20 mijë qytetarë, por edhe studentë që do të trajnohen me aftësitë teknike specifike, edhe për manovrim makinerish, për rekrutimin e të cilëve ai ftoi edhe këtë biznes që të bashkëpunojë me Shërbimin Kombëtar të Punës.
