Gjyqtarja e Apelit të Krimeve të Rënda, Albana Boksi është konfirmuar në detyrë nga Komisioni i Pavarur i Kualifikimit.
Me seancën dëgjimore Boksi u përball të enjten e nuk pati probleme me procesin e Vetting-ut.
Trupa gjykuese e Komisionit të Pavarur të Kualifikimit përbëhej nga Etleda Çiftja kryesuese, Firdes Shuli relatore dhe Pamela Qirko anëtare, ndërsa në cilësinë e vëzhguesit ndërkombëtar ishte e pranishme Marie Tuma.
Gjyqtarja Boksi është vlerësuar bazuar në tri komponentë; për deklarimin e pasurisë, pastërtinë e figurës dhe profesionalizimin.
Relatorja e çështjes, Firdes Shuli u shpreh se gjyqtarja Boksi ka qenë tërësisht bashkëpunuese gjatë gjithë procesit të verifikimit, gjë që do të konsiderohej gjatë marrjes së vendimit.
Ndërsa Inspektorati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI ka raportuar pranë komisionit se gjyqtarja Albana Boksi ka kryer deklarim të saktë, ka burime të ligjshme për krijimin e pasurive që zotëron, nuk ka kryer deklarim të rremë apo fshehje të pasurisë dhe nuk gjendet në kushtet e konfliktit të interesit.
