Forca të shumta të policisë së rendit, FNSH, Shqiponja dhe policisë bashkiake kanë zbarkuar mëngjesin e të enjtes në unazën e re në zonën e Astirit, ku ka nisur prishja e objekteve në lotin e dytë që preket nga zgjerimi i unazës. Mësohet se ka patur tensione mes policisë dhe banorëve po nuk raportohet për të lënduar apo dhunë fizike.
Në terren ndodhen mbi 300 punonjës policie, 4 mjete të rënda tonazhi disa mjete zjarrëfikëse dhe autoambulanca. Nga ora 6 e mëngjesit janë shembur me mjete të rënda 6 objekte, 1, 2, 3 katshe. Në listën e objekteve është edhe një ndërtesë 5 katëshe.
Banorët janë shprehur se nuk janë njoftuar në rrugë shkresore për vendimin e prishjes por vetëm verbalisht. Të tjerë thonë kanë fituar në shkallën e parë të gjyqësorit dhe IKMT nuk mund të vijë e tu prish shtëpitë pa një vendim të formës së prerë.
Ndërkohë policia ka bllokuar totalisht qarkullimin e automjeteve në lotin e dytë të unazës në Astir por jo qarkullimin e këmbësorve sic është vepruar në rastet analoge. Bllokimi i unazës dhe devijimi i automjeteve në rrugët sekondare ka krijuar rradhë kilometrike dhe orë të gjata në trafik.
