Udhëheqësit politikë “e nënvlerësuan” shkallën e rrezikut që paraqet koronavirusi, tha presidentja e Komisionit Evropian, Urusla von der Leyen.
“Mendoj se të gjithë ne, që nuk jemi ekspertë, e kemi nënvlerësuar fillimisht koronavirusin”, tha von der Leyen në një intervistë për gazetën gjermane, Bild.
“Tani, është e qartë se ky është një virus që do të na mbajë të zënë për një kohë të gjatë”, tha ajo.
Koronavirusi, i cili për herë të parë është shfaqur në Kinë në fund të vitit të kaluar, ka përfshirë gjithë globin, duke infektuar gati 200,000 njerëz dhe duke vrarë mbi 7,950.
Bashkimi Evropian ka marrë vendim të martën që të ndalojë hyrjen e udhëtarëve prej jashtë bllokut, për 30 ditë, në përpjekje për të frenuar përhapjen e koronavirusit.
Italia dhe Spanja janë dy vendet e goditura më së keqi në Evropë.
Megjithatë, von der Leyen refuzoi të përdorë gjuhën e presidentit francez, Emmanuel Macron, i cili e krahasoi shpërthimin e koronavirusit me luftë dhe e urdhëroi gjithë popullsinë të qëndrojë në shtëpi për së paku dy javë.
“Personalisht, nuk do ta përdorja këtë term, por e kuptoj qëllimin e presidentit të Francës, sepse koronavirusi është një armik shqetësues”, tha von der Leyen.
BE do të mbyll kufijtë për 30 ditë si masë për parandalimin e koronavirusit. Lajmi u dha nga Presidenti i Këshillit Europian, Charles Michel pas kërkesës së propozuar nga Komisionin Europian.
“Ne kemi miratuar udhëzimet e propozuara nga Komisioni për Menaxhimin e Kufijve. Për të kufizuar më tej përhapjen e virusit, ne kemi rënë dakord të forcojmë kufijtë e jashtëm duke zbatuar një kufizim të koordinuar të përkohshëm të hyrjeve jo emergjente për 30 ditë”, tha Michel.
Kufijtë janë mbyllur për të gjitha udhëtimet jo thelbësore. Masat kufizuese nuk vlejnë për qytetarët e BE-së, banorët e përhershëm të vendeve të BE-së, diplomatët dhe stafin mjekësor, si dhe ekspertët që ndihmojnë në ndalimin e koronavirusit.
