Një mjek francez ka ndërruar jetë ditën e djeshme në një spital në Compiègne, në departamentin francez Oise.
Lajmi e ka konfirmuar sot ministri i Shëndetësisë në Francë Olivier Véran, i cili ka vlerësuar guximin e jashtëzakonshëm të mjekëve, infermierëve, zjarrfikësve, të gjithëve që shpëtojnë jetën dita ditës.
Viktima është një mjek urgjence nga Compiègne, në Oise, një nga departamentet e para që është prekur masivisht në Francë. Mjeku humbi jetën pas transferimit të tij në Lille.
Djali i viktimës tha sot: “Babai im sakrifikoi veten. Ai ishte në pension dhe mund të ishte ndalur, por ai vazhdonte të vinte sepse gjithmonë dëshironte të ndihmonte kolegët e tij. Ai punoi sepse e donte, ishte jeta e tij. Kjo është e padrejtë. Jemi të trishtuar dhe të zemëruar”.
Ndërsa dhjetra mjekë të spitalit kanë kritikuar publikisht qeverinë franceze gjatë javës së fundit, duke denoncuar mungesën e fondeve duke treguar se shumë prej tyre po punojnë pa maska për shkak të mungesës, e cila mund të çojë në më shumë ndotje.
Kujtojmë që në Francë deri më tani janë 450 viktima dhe 12.612 të prekur.
“Vala është këtu. Kjo është një luftë, ajo do të zgjasë. Mbroni më të dobëtin dhe sistemin tonë shëndetësor, por gjithashtu menaxhoni ‘stresin’ e shoqërisë dhe të përgatiteni për të përballuar një krizë të paparë financiare, një krizë në ekonominë reale”, kështu u shpreh presidenti i Francës, Emmanuelle Macron në një deklaratë për mediat, referuar shpërthimit të koronavirusit.
