Regjisori i njohur, një nga figurat më në zë të lëvizjes pro Teatrit Kombëtar, Edmond Budina ka ftuar protestuesit për një minutë heshtje por jo në shenjë zie por në shenjë reflektimi.
“Një minutë heshtje për të reflektuar dhe më pas thërrisni Rroftë Teatri, Rroftë Demokracia, Rroftë Shqipëria”, apeloi ai duke iu kërkuar protestuesve dhe qytetarëve të ngrihen për demokracinë.
Më pas thirrjet “E duam Shqipërinë si gjithë Europa” kanë mbushur bulevardin.
Regjisori Edmond Budina në fjalën e tij në protestën kundër shembjes të Teatrit Kombëtar deklaroi se presidenti duhet që të shpërndajë parlamentin pas kësaj që ka ndodhur.
Budina tha se protestat duhet të vazhdojnë, deri në rrëzimin e kësaj qeverie, të cilën e ka quajtur kriminale.
“Shqiptarët nuk durojnë diktaturën. Shqipëria nuk duron kulturën diktatoriale. Ata donin të bënin varrin Teatrit dhe do kenë varrin e tyre politik gati. Një arkitekt italian ka thënë se shembja e godinës së Teatrit është bërë nga një grup mafiozësh. Teatrin e shembi politika në bashkëpunim me mafien. Ne duhet të reagojmë të gjithë bashkë. Teatri është histori shpirtrash njerëzor.
Në protestë ka edhe sobotues, duhet kujdes. Të gjithë qytetarët të bashkohen në këtë kauzë njerëzore. Ne duam shpirt, jo kriminelë, jo banditë. Presidenti të bëjë shpërndarjen e parlamentit. Duhet që të protestojmë deri në rrëzimin e qeverisë kriminale. Do e rindërtojmë Teatrin. Të mos ndalojmë protestat. Të gjithë ata që rrënuan Teatrin duhet të shkojnë në burg. Duhet të thërrasim të gjithë rroftë Shqipëria, rroftë Teatri, rroftë Demokracia”, tha regjisori Budina.
